Nos conventus ecclesie Sancti Michaelis archangeli de Chorna memorie commendamus per presentes, quod honorabiles et religiosi fratres, Michael de Iaurino custos ac Urbanus de Feldwar prior, presbyteri monachi professi monasterii Sancti Martini Sacri Montis Pannonie nostram venientes in presenciam in ipsorum propriis ac conventus dicti monasterii Sancti Martini nominibus et personis cum procuratoriis literis eiusdem per modum protestacionis, revocacionis et inhibicionis nobis significare curaverunt in hunc modum: qualiter novissimis his superioribus temporibus preteritis, reverendus in Christo pater dominus Matheus, abbas annotati monasterii Sancti Martini, nescitur unde circumventus, ad quandam simplicem exposicionem magnifici domini Iohannis Bornemiza de Berzenche, castellani castri Budensis, favore ipsius allectus, allegando idem Iohannes Bornemiza de Berzenche, quod directa medietas possessionis Chechen in comitatu Iauriensi existentis habite, per quondam Paulum Danch, ipsi monasterio Sancti Martini titulo pignore (!) fuisset pro ducentis florenis obligata et sue redempcioni ex quadam inscripcione ipsius quondam Pauli Danch competere, idem abbas eidem remisisset literasque expeditorias quasdam super restitucione illorum ducentorum florenorum vi et per forcia tunc ipsis protestantibus sub sigillo ipsorum extradari procurasset.||
Cum autem iidem protestantes ex vera instruccione certorum privilegiorum ipsorum non ex impignoracione ipsius quondam Pauli Danch, sed per quandam concambialem permutacionem cum nobilibus Dersfy et abbate Sancti Iacobi de Silyzio dicto monasterio pertinere sciant, prelato ipsorum contraire nequeuntes, literas premissas nolle eorum extradedisset, viribus omnino carituras reliquissent et easdem penitus et omnino revocassent, prout revocarunt et retractarunt coram nobis.||
Et nichilominus post huiusmodi revocacionem et protestacionem quorum supra nominibus, annotatum abbatem ab omni donacione, remissisne vendicioneque predicte totalis medietatis possessionis Chechen, annotatum vero Iohannem Bornemiza et alios quoscunque utriusque sexus homines ex nunc prout extunc et e converso etc. empcione, occupacione, detencione et conservacione et quovis quesito sub colore sibi ipsis usurpacione et statui faccione usu fructuumque et quarumlibet utilitatum eiusdem possessionis percepcione seu percipifaccione, regiam eciam maiestatem a donacione, collacione consensusque sui regii desuper prebicione, loca eciam omnia credibilia a literarum quarumcunque superinde extradacione quomodolibet iam factis vel flendis prohibuerunt contradicendo et contradixerunt inhibendo publice et manifeste, coram nobis harum nostrarum vigore et testimonio litterarum mediante. Datum feria quinta proxima post festum Nativitatis B. V. Marie MDXVIII. [1518. szept. 9.]