Nos capitulum ecclesie Veteri Budensis memorie commendamus, quod religiosi fratres, Paulus de superioribus termis Budensibus et Iohannes de Pesth, presbyteri Ordinis Sancti Benedicti, conventuales monasterii Sancti Martini Sacri Montis Pannonie in ipsorum propriis ac reverendi in Christo patris domini Mathei, abbatis et conventus eiusdem monasterii personis et nominibus cum procuratoriis literis eorum nostram venientes in presenciam per modum protestacionis, revocacionis et inhibicionis nobis significare curarunt in hunc modum: Quod licet alias dicti dominus Matheus abbas et conventus, protestantes in profesto Beati Georgii martyris proxime preterito religiosos fratres Martinum de Tyrnavia et Matheum de Thatha presbyteros et socios eorum conventuales ad quandam protestacionem contra reverendum in Christo patrem dominum Iohannem Gozthon episcopum ecclesie Iauriensis in conventu Cruciferorum domus hospitalis ecclesie Beati regis Stephani de Alba transmisissent faciendam, non tamen rite et preceptive informacionem prenominatorum domini Mathei abbatis et conventus accepissent, sed extra eandem coram ipso conventu Cruciferorum protestati extitissent literasque ab ipsis extraxissent. Unde annotati fratres Paulus et Iohannes nominibus quorum supra prescriptorum fratrum, Martini et Mathei, protestancium renovacionem et inhibicionem vigore procuratoria prenotata per omnia renovassent et retractassent, sed unam novam et infrascriptam protestacionem pari consensu fecissent, quomodo prefatus reverendus dominus Iohannes episcopus Gozthon vigore quarundem literarum serenissimi domini Ludovici, Hungarie et Bohemie etc. regis domini nostri graciosissimi requisitoriarum conventui prefato in eo preceptorie sonencium, ut ipsi quasdam literas fassionales fructum castri Somlyo vocati in comitatu Wesprimiensi habiti concernentes in sacrestia seu conservatorio ecclesie eorundem prenotate requirere inventasque eidem domino Iohanni episcopo in transsumpto literarum eorumdem absque aliquo dolo et fraude extradare debuissent; qui mandato regio, ut tenebantur, obtemperantes literas easdem diligenter inquisivissent inventasque eidem domino Iohanni episcopo in transsumpto literarum eorundem, ut prefertur, extradari fecissent. Nunc autem a dictis protestantibus dubitatur, an paria earundem in conservatorio ipsorum modo premisso repertarum sint vera an non, et timent, ne propter earundem extradacionem ipsi monasterio consequenterque annotatis protestantibus sigilloque eorum preiudicium, dampnum aut gravamen generaliter aut quomodolibet incurrere posset; ex eo videlicet ne dictas literas ex aliquorum forsan ordinacione illac, prout crebrius contigit aut contigere potuisset, potissimum cum dicta abbacia Sancti Martini a multis retroactis temporibus a secularibus gubernata, in dictum conservatorium fradulenter imiposita el locata extitisset (!)||
Facta itaque huiusmodi protestacione sepefati fratres Paulus et Iohannes se et in quantum dicte litere per eos extradate sint vere, vigorem obtineant, sin autem minime aut alias qualitercunque quovis quesito sub colore conficte, subordinate et ... sint renovate et per eosdem protestantes penitus cassate ab ulteriorique priorum literarum protestacionalium extradacione quibuscunque facienda iidem protestantes prohibuerunt et minutam earundem per dictos Cruciferos omnino aboleri procurarunt coram nobis harum nostrarum vigore et testimonio mediante. Datum sabbato infra octavas Penthecostes, anno Domini millesimo quingentesimo decimo octavo. [1518. máj. 29.]