Leonardus, miseracione divina tituli Sancti Petri ad vincula presbyter cardinalis religioso viro abbati monasterii de Circh Wesprimiensis diocesis salutem in Domino. Ex parte Mathei moderni archiabbatis monasterii Sancti Martini Sacri Montis Pannonie Ordinis Sancti Benedicti Iauriensis diocesis nobis oblata peticio continebat, quod alias ipse, simplicitate ac alias importunis sollicitudinibus et infestacionibus certorum abbatum dicti Ordinis inductus, cuidam privilegio declaratorio, per dominum papam seu sedem apostolicam dicto suo monasterio dudum concesso, renunciavit et illo non uti promisit et iuravit, prout in quodam publico instrumento, per quendam notarium publicum in presencia Andree prepositi de Chasma stipulato, plenius dicitur contineri. Cum autem, sicut eadem subiungebat peticio, renunciacio, promissio ac iuramentum predictum in sui ac successorum suorum et monasterii predicti detrimentum vergant, cupiatque propterea iuramentum predictum sibi relaxari ac dicto privilegio declaratorio sine consciencie scrupulo uti posse: supplicari fecit humiliter dictus exponens sibi super his per sedem apostolicam de opportuno remedio misericorditer provideri.||
Nos igitur attendentes, quod iuramentum non debet esse vinculum iniquitatis, auctoritate domini pape, cuius penitenciarie curam gerimus, et de eius speciali mandato, super hoc vive vocis oraculo nobis facto, discrecioni tue committimus, quatenus -- iniuncta prius eidem exponenti a temeritate iurandi, periurii forsan reatu, quatenus dicto privilegio post iuramentum per eum, ut promittitur, prestitum usus fuerit, et excessibus huiusmodi absolucione, debita previa pro modo culpe penitencia, salutari -- sibi iuramentum ad hoc, quod dicto privilegio licite et libere absque consciencie scrupulo uti possit, relaxes, necnon iustrumentum predictum quoad eundem effectum penitus casses et annulles. Datum Rome apud Sanctum Petrum sub sigillo officii penitenciarie, Idibus Septembribus, pontificatus domini Leonis pape decimi anno septimo [1519. szept. 13.]