Clemens episcopus, servus servorum Dei, dilectis filiis ... abbati monasterii de Tichon eiusque fratribus tam presentibus, quam futuris, religiosam vitam professis in perpetuum. Religiosam vitam eligentibus apostolicum convenit adesse presidium, ne forte cuiuslibet temeritatis incursus aut eos a proposito revocet, aut robur, quod absit, sacre religionis infringat. Eapropter dilecti in Domino filii vestris iustis postulacionibus clementer anuimus et monasterium de Tychon, Vesprimiensis diocesis, in quo divino estis obsequio mancipati, sub Beati Petri et nostra proteccione suscipimus et presentis scripti privilegio communimus. Inprimis siquidem statuentes, ut ordo monasticus, qui secundum Deum et Beati Benedicti regulam in eodem monasterio institutus esse dinoscitur, perpetuis ibidem temporibus inviolabiliter observetur. Preterea quascunque possessiones, quecunque bona idem monasterium inpresenciarum iuste ac canonice possidet aut in futurum concessione pontificum, largicione regum vel principum, oblacione fidelium seu aiis iustis modis prestante Domino poterit adipisci, firma vobis vestrisque successoribus et illibata permaneant. In quibus hec propiis duximus exprimenda vocabulis:||
Locum ipsum, in quo prefatum monasterium situm est, cum omnibus pertinenciis suis. Cellam monachorum, que Vruzku vulgariter nominatur, cum terris, vineis, possessionibus et omnibus pertinenciis suis. Sancti Mychaelis, Sancti Dominici, Sancte Marie Magdalene et Sancte Elysabeth capellas cum omnibus pertinenciis earundem. Castrum ipsius monasterii necnon villam Apaty et insulam, que appellatur Thyhan, cum omnibus pertinenciis suis. Portum super lacum, qui Balatyn nominatur, usum piscandi, quem in eodem lacu habetis. Villas novam et predium, quod vocatur Ozofev; terras et possessiones, quas habetis in villa Kuesd; predium de Eurmenus, terras sitas in villa Vduory; predia, que de Dergvche, de Vasyl, de Pylip et de Vrskaal vulgariter nominantur, cum omnibus pertinenciis eorundem. Villam, que Thovsoch dicitur; terras et possessiones, quas habetis in villa Berend. Villam Scevleus nominatam, sitam iuxta locum, qui dicitur Apachasumlo; terras et possessiones, quas habetis in villa Scevlevs apud Vesprem; predium, quod Popsuka vu(l)gariter appellatur, et ius patronatus, quod in ecclesia Sancti Mychaelis loci eiusdem habetis. Predium, quod de Vylach cum iure patronatus, quod in capella Sancte Margarethe, sita in eodem predio, optinetis. Predia de Keyk et de Araach vulgariter nominata; insula(m), que appellatur Losta, cum omnibus pertinenciis suis. Villam, possessiones et terras de Tvruk. Villam et predium de Somthod, predium de Zarastho, predium et villam de Gesnov vel Apaty iuxta Fycog, predium de Telky; terras et possessiones, quas habetis in villa Chopulch et Lapa; predium de Gamas, villam Dob; terras et possessiones, quas habetis in villa Sag iuxta Jotha, de Chychol et de Kup; predia, villam Mortus iuxta Buchak, predium de Vrkutha et terras, quas habetis in villa Barand iuxta Tholna, et villam de Fod; villam et predium de Besenev in partibus Budrig cum iure patronatus, quod ibidem in capella Sancte Marie habetis. Lacum Mortuum cum omnibus terris, ad ipsum pertinentibus. Homuke-vt terras et possessiones, que vocantur Colun. Annuum reditum denariorum, quem habetis in loco, qui Simigium vulgariter nominatur. Annuos reditus denariorum in portibus et mercatis de Tolna et de Pest; et mille zuanos salis, quos in Alba singulis annis percipitis a salinariis de Zalach. -- Terras quoque et possessiones, quas beate memorie rex Vngarie, Andreas, vobis et monasterio vestro commisit intuitu pietatis, ac quicquid iuris in Strigoniensi, Vesprimiensi, Colochensi, Quinqueecclesiensi et Chanadiensi diocesibus optinetis, cum terris, pratis, vineis, nemoribus, usuagiis et pascuis, in bosco et plano, in aquis et molendinis, in viis et semitis et omnibus aliis libertatibus et immunitatibus suis. Sane novalium vestrorum, que propriis manibus, multis sumptibus colitis, de quibus aliquis hactenus non percepit, sive de vestrorum animalium nutrimentis nullus a vobis decimas exhigere vel extorquere presummat.||
Liceat quoque vobis clericos vel laicos liberos et absolutos a seculo fugientes ad conversionem recipere et eos absque contradiccione aliqua retinere. -- Prohibemus insuper, ut nulli fratrum vestrorum post factam in monasterio vestro professionem fas sit sine abbatis sui licencia, nisi arcioris religionis obtentu, de eodem loco discedere, et absque communi litterarum vestrarum caucione nullus audeat retinere. -- Cum autem generale interdictum terre fuerit, liceat vobis, clausis ianuis, excommunicatis et interdictis exclusis, non pulsatis campanis, suppressa voce divina officia celebrare, dummodo causam non dederitis interdicto. -- Chrisma vero, oleum sanctum, consecraciones altarium seu basilicarum, ordinaciones clericorum, qui ad ordines fuerint promovendi, a diocesano suscipietis episcopo, si quidem catholicus fuerit et graciam et communionem sacrosancte Romane sedis habuerit et ea vobis voluerit sine pravitate aliqua exhibere. -- Prohibemus insuper, ut infra fines parrochie vestre, si eam habetis, nullus sine assensu diocesani episcopi et vestro capellam seu oratorium de novo construere audeat, salvis privilegiis pontificum Romanorum. Ad hec novas et indebitas acciones ab archiepiscopis, episcopis, archidiaconis seu decanis aliisque omnibus ecclesiasticis secularibusve personis a vobis omnino fieri prohibemus. -- Sepulturam quoque illius loci liberam esse decernimus, ut eorum devocioni et extreme voluntati, qui se illic sepeliri deliberaverint, nisi forte excommunicati vel interdicti sint aut eciam publice usurari, nullus obsistat. Salva tamen iusticia illarum ecclesiarum, a quibus mortuorum corpora assumpmuntur. -- Decimas preterea et possessiones, ad ius ecclesiarum vestrarum spectantes, que a laicis detinentur, redimendi et legitime liberandi de manibus eorum et ad ecclesias, ad quas pertinent, revocandi libera sit vobis de nostra auctoritate facultas. -- Obeunte vero te, nunc eiusdem loci abbate, vel tuorum quolibet successorum, nullus ibidem qualibet surrepcionis astucia seu violencia preponatur, nisi quem fratres communi consensu vel fratrum maior pars consilii sanioris secundum Deum et Beati Benedicti regulam providerint eligendum. -- Paci quoque et tranquillitati vestre paterna in posterum sollicitudine providere volentes auctoritate apostolica prohibemus, ut infra clausuras locorum seu grangiarum vestrarum nullus rapinam seu furtum facere, ignem apponere, sanguinem fundere, hominem themere capere vel interficere seu violenciam audeat exercere. – Preterea omnes libertates et immunitates, a predecessoribus nostris Romanis pontificibus monasterio vestro concessas, necnon libertates et exempciones secularium exaccionum, a regibus et principibus vel aliis Christi fidelibus racionabiliter vobis indultas, auctoritate apostolica confirmamus et presentis scripti privilegio communimus.||
Decernimus ergo, ut nulli omnino hominum liceat prefatum monasterium themere perturbare aut eius possessiones auferre vel ablatas retinere, minuere seu quibuslibet vexacionibus fatigare, sed omnia integra conserventur eorum, pro quorum gubernacione ac sustentacione concessa sunt, usibus omnimodis profutura, salva sedis apostolice auctoritate et diocesani episcopi canonica iusticia. Si qua igitur in futurum ecclesiastica secularisve persona hanc nostre constitucionis paginam sciens, contra eam themere venire temptaverit, secundo terciove commonita, nisi reatum suum congrua satisfaccione correxerit, potestatis honorisque sui careat dignitatem (!), reamque se divino iudicio existere de perpetrata iniquitate cognoscat et a sacratissimo corpore ac sanguine Dei et Domini redemptoris nostri Iesu Christi aliena fiat, atque in extremo examine districte subiaceat ulcioni. Cunctis autem eidem loco sua iura servantibus sit pax Domini nostri Iesu Christi, quatenus et hic fructum bone accionis percipiant et apud districtum iudicem premia eterne pacis inveniant. Amen. Amen. Amen.||
Oculi mei semper ad Dominum. Bene valete! (A pápai kézjegy jelmondata és a monogramma.)||
Ego Clemens catholice ecclesie episcopus ss. (subscripsi.) + Ego Odo Tusculanus episcopus ss. + Ego Stephanus Prenestinus episcopus ss. + Ego frater Iohannes Portuensis ecclesie Sancte Rufine episcopus ss. + Ego Henricus Ostiensis et Velletrensis episcopus ss. -- + Ego Ancherus [tituli Sancte Pra]xedis presbiter cardinalis ss. -- + Ego Guillelmus tituli Sancti Marci presbiter cardinalis ss. -- + Ego Octavianus Sancte Marie in via lata diaconus cardinalis ss. -- + Ego Iohannes Sancti Nicolai in carcere Tulliano diaconus cardinalis ss. – + Ego Iacobus Sancte Marie in Cosmydin diaconus cardinalis subscripsi. -- + Ego Goteffridus Sancti Georgii ad velum aureum diaconus cardinalis ss. -- + Ego Vbertus Sancti Eustachii diaconus cardinalis ss.||
Datum Viterbii per manus magistri Michaelis, sancte Romane ecclesie vicecancellarii, III. Idus Ianuarii, indiccione X, incarnacionis dominice anno Mo CCo LXo sexto(!), [1267. jan. 11. (!)] pontificates vero donni (!) Clementis pape IIII-i anno secundo.