Nos Lodouicus, Dei gracia rex Hungarie, Polonie, Dalmacie etc. memorie commendantes tenore presencium significamus, quibus expedit, universis, quod religiosus vir, frater Georgius, abbas monasterii Sancti Aniani de Tykonio, ad nostre serenitatis accedendo presenciam lamentabili conquerela nostre detexit maiestati, quod predecessores abbates dicti monasterii eorum salutis immemores, Dei timore postposito plures possessiones, tributa, molendina ac alia iura dicti monasterii quibusdam personis infeudassent, vendidissent, pignori obligassent et a dicto monasterio dilapidassent, aliis eciam suis bonis (!) alienassent in ipsorum salutis dispendium et periculum animarum, propter quod factum ipsum monasterium ad extreme paupertatis inopiam adeo reductum haberetur, ut pauci fratres Deo servientes sustentari possent in eodem, suplicans nostre celsitudini, ut desolacioni et devastacioni ipsius monasterii de remedio dignaremur provideri (!) oportuno. Nos itaque, [prout nostro regio incumbit officio, Spiritus Sancti nobis suggerente gracia, que ad bonum suadet unumquemque, dicto monasterio dilapidato] et devastato, [cuius veri sumus patroni et tutores speciales, per oportuna remedia obviare cupientes, ne bona nostrorum progenitorum, in patrimonium Crucifixi] ipsi monasterio donata et [collata, in usus prophanos convertantur] et in nichilum redigantur, ob remedium (!) potissime Beati Anyani, in cuius nomine ipsum monasterium fundatum, dotatum existit et constructum, [matura exinde deliberacione unacum prelatis et baronibus regni nostri prehabita, de eorundem consilio omnes infeudaciones, vendiciones, impignoraciones et] quaslibet [alienaciones, de possessionibus et aliis iuribus ac bonis ipsius monasterii] Beati Anyani [per predecessores] ipsius abbatis prodigos et [proditores ac sacrilegos quibuspiam personis] factas, [datas vel concessas, cassamus], anulamus, [irritamus] et per omnia [revocamus] presencium patrocinio mediante. Datum in Wyssegrad, in vigilia festi Nativitatis Beati Iohannis Baptiste, anno Domini Mo CCCmo LXXXmo secundo. [1382. jún. 23.]