Omnibus Christi fidelibus tam presentibus, quam futuris, presencium noticiam habituris, conventus monasterii Beati Adriani martiris de Zala salutem in vero salutis largitore. Cum mundi labilis condicio sit caduca et geste rei memoria propter vitam brevem hominum caligine oblivionis obfuscata nequeat in evum perdurare, provida mens et solicitudo adinvenit, ut que in tempore geruntur, ne simul labantur cum eodem, litterarum testimonio solent solidari. Proinde ad universorum noticiam harum serie volumus pervenire, quod cum nos quasdam litteras magnifici viri domini Leustachii, regni Hungarie palatini ac comitis Albensis recaptivatorias pariter et statutorias nobis directas amicabiliter recepissemus in hec verba:||
Amicis suis reverendis, conventui ecclesie Zaladiensis, Leustachius, regni Hungarie palatinus ac comes Albensis amiciciam paratam cum honore. Dicitur nobis in personis domini fratris Georgii abbatis et conventus ecclesie Thykoniensis, quod quedam porciones possessionarie in possessione Wazzwl vocata, nunc apud manus Iohannis et pridem Egidii, nunc ab hac luce decessi, nobilium de Gwlaach occupative habite, dicte eorum ecclesie et per consequens ipsorum essent ac de iure eis pertinerent, legittima recaptivacione et ecclesie ipsorum predicte ac per consequens ipsis statuifaccione plurimum indigerent. Super quo vestram amiciciam presentibus petimus diligenter, quatenus vestrum mittatis hominem pro testimonio fide dignum, quo presente Stephanus, filius Mychaelis de Appaty vel Thomas, filius alterius Mychaelis de Hene seu Sebastianus de Wduary aut Iohannes, filius Iohannis de Menchel aliis absentibus homo noster ad facies dictarum porcionum possessionariarum, vicinis et commetaneis earum universis inibi legittime convocatis et presentibus, accedendo recapiat easdem nomine iuris dicte ecclesie Thykonyensis recaptivatasque statuat easdem cum omnibus earum utilitatibus et pertinenciis universis eidem ecclesie Thykonyensi et per consequens ipsis domino fratri Georgio abbati et conventui eo iure, quo ipsis dinosscuntur pertinere, perpetuo possidendas, si non fuerit contradictum, contradictores vero, si qui fuerint, citet eosdem contra annotatos dominum fratrem Georgium abbatem et conventum in nostram presenciam ad terminum competentem, racionem contradiccionis eorum reddituros. Et post hec ipsarum possessionarie recaptivacionis seriem et statucionis vel nomina contradictorum et citatorum, si qui fuerint, cum termino assignato nobis amicabiliter rescribatis. Datum in Wyssegrad feria tercia proxima ante festum Beatorum Cosme et Damiani martirum, anno Domini millesimo CCCmo nonagesimo quarto. [1394. szept. 22.]||
Nos igitur amicabilibus peticionibus eiusdem domini Leustachii palatini acquiesscentes et iuxta earundem continenciam unacum prefato Thoma, filio Mychaelis de dicta Hene, homine suo in eisdem litteris suis inter alios nominatim conscripto, nostrum hominem, videlicet religiosum virum fratrem Iacobum, ordinis nostri dyaconem (!), unum ex nobis, ad premissas recaptivacionem et statucionem faciendas nostro pro testimonio duxissemus destinandum. Qui tandem ad nos exinde reversi nobis uniformiter retulerunt, quod ipsi feria tercia proxima ante festum Omnium Sanctorum proxime preterita ad facies premissarum [1394. okt. 27.] possessionariarum porcionum, vicinis et commetaneis suis universis illic legittime convocatis et presentibus, accessissent, easdem nomine iuris predicte ecclesie Thykonyensis recaptivassent ipsasque recaptivatas cum omnibus earum utilitatibus et pertinenciis universis, quovis nominis vocabulo vocitatis, ipsi ecclesie Thykonyensi et per consequens pretitulatis domino fratri Georgio abbati et conventui iure ipsis incumbenti perpetuo possidendas et habendas ac tenendas statuissent, nullo contradictore nec ibi tunc, nec demum coram nobis apparente. In cuius rei memoriam firmitatemque perpetuam presentes eisdem concessimus litteras nostras privilegiales pendentis et autentici sigilli nostri munimine roboratas. Datum vigesimo quinto die termini prenotati, anno Domini supradicto. [1394. nov. 20.]