[C]onventus monasterii Saxardiensis omnibus Christi fidelibus presentibus pariterque futuris, presentes litteras inspecturis, salutem in homino sempiternam. Ad universorum noticiam tam presencium, quam futurorum harum serie volumus pervenire, quod religiosus vir dominus frater Georgius abbas monasterii de Tyhon ad nostram accedens presenciam exhibuit nobis quasdam litteras privilegiales honorabilis conventus domus hospitalis Iherosolimitani de Alba non abrasas, non cancellatas, nec in aliqua sui parte viciatas, sed proorsus (!) omni suspicione carentes, petens nos debita cum instantia, ut easdem de verbo ad verbum transscribi transsumptumque earum in formam nostri privilegii facere dignaremur. Quarum quidem litterarum tenor per omnia talis est:||
Conventus domus hospitalis Iherosolimitani de Alba omnibus christiane fidei cultoribus presentibus paraiter (!) et futuris, presentes litteras inspecturis, salutem in Domino sempiternam. Ad cunctorum noticiam tenore presencium volumus pervenire, quod Ieronimo, venerabili abbate monasterii Thykoniensis et Petro, filio Guza de Gamas ac Paulo, filio Jolegen de Eurminus, iobagionibus naturalibus eiusdem monasterii ab una parte, Nemvog et Hecha, filiis Bosa, Pentuk et Petha filio eiusdem, Paulo, filio Reka, et Iohanne, filio Nicolay de villa Zarozou ex altera coram nobis personaliter constitutis, propositum ab eisdem extitit, quod cum officium pulsatoriale, in quo dicto monasterio Nemveg (!) et sui socii iamdicti tenentur, grave eisdem quodammodo videretur subportare et eciam ipsum monasterium minus indigeret ipsorum pretaxato servicio, ad ipsius Nemveg et suorum prefatorum sociorum instantem peticionem idem abbas et conventus monasterii prenotati concesserunt de consensu iobagionum predictorum, ut idem Nemvog (!) et eius socii sepedicti eorumque successores seu heredes a singulis suis mansionibus singulis annis in festo Beati Martini confessoris singula septem pondera cum iusto Albensi pondere dicto monasterio solvere tenebuntur, a prememorato pulsatoriali officio exempti pariter et penitus absoluti. In cuius rei testimonio (!) et perpetuam stabilitatem ad utriusque partis peticionem litteras presentes dedimus sigili (!) nostri munimine roboratas. Anno Domini Mo CCo LXo nono, XIIo Kalendas Februarii, [1269. jan. 21.] fratre Tesselino priore eodemque custode ecclesie nostre existente.||
Nos igitur iustis et congruis peticionibus annotati domini fratris Georgii abbatis benigne aquiesscentes easdem litteras de verbo ad verbum transscribi, transsumpmi transscriptumque earundem in formam nostri privilegii maiorem rei ad cautelam redigi dignare fecimus. In cuius rei memoriam perpetuamque firmitatem presentes litteras nostras privilegiales pendentis et autentici sigilli munimine roboratas duximus concedendas. Datum feria sexta proxima post festum Beate (!) Luce evangeliste, anno Domini Mmo CCCmo [1397. okt. 19.] nonagesimo septimo, presentibus itaque viris religiosis videlicet Petro priore, Martino custode et altero Martino cantore ceterisque fratribus quamplurimis in ecclesia Dei iugiter Christo famulantibus et devote.