Nos Mathias, Dei gracia rex Hungarie, Dalmacie, Croacie etc. memorie conmendamus per presentes, quod religiosus frater Sigismundus, prior ecclesie de Leweld, personaliter ac Nicolaus de Thard pro conventu eiusdem ecclesie de Leweld cum procuratoriis litteris eiusdem ab una, item venerabilis et religiosus frater Ladislaus, abbas ecclesie de Thykonio, modo simili personaliter ac Emericus litteratus de Kysberen pro conventu eiusdem ecclesie cum procuratoriis litteris capituli ecclesie Wesprimiensis ab altera partibus coram nobis constituti, per eosdem fratrem Sigismundum priorem et Nicolaum litteratum procuratorem dicti conventus in persona eiusdem confessum extitit pariter et relatum nobis in hunc modum, quomodo ipsi illam particulam terrarum arabilium et pratorum, que eisdem tempore metarum reambulacionis cuiusdam possessionis ipsorum Feyereghaz vocate, in comitatu Simigiensi habite, a parte porcionis possessionarie eorumdem Ladislai abbatis et conventus Chychal vocate, in eodem comitatu existentis, pridem per hominem nostrum regium presente testimonio dicti capituli ecclesie Wesprimiensis legittime statute fuissent et super quibus nunc iidem Ladislaus abbas et conventus predicte ecclesie ipsorum iura efficacia et privilegia autencia habere etc. asserunt, tum propter cause eiusmodi difficultatem et littigionarii processus exinde fiendi gravitatem, tum eciam, ut ipse scilicet frater Sigismundus prior cum suis antedictis conventualibus fratribus ad divina obsequia, quibus dati sunt, comodius et attencius assistere valeant, easdem terrarum particulas et prata, quas iidem Ladislaus abbas et conventus ante tempus huiusmodi metarum reambulacionis sub quibusdam signis metalibus hactenus usi fuissent et tenuissent, eidem Ladislao abbati et conventui usque tempus vite ipsorum, fratris scilicet Sigismundi prioris et Ladislai abbatis uti, frui et possidere annuissent et comisissent, immo annuerunt et concesserunt coram nobis. Preterea eedem partes sese mutuo de et super universis dampnis, nocumentis, iniuriis, actibus potenciariis et generaliter quibusvis malorum generibus, hactenus inter ipsos ac Benedictum de Thoth et Nicolaum litteratum de Thard nobiles, necnon ceteros familiares ipsorum ignobiles ac iobagiones in alterutrum qualitercumque patratis et commissis, reddidissent et commisissent immo reddiderunt et commiserunt coram nobis quittos, expeditos et modis omnibus absolutos, universas eciam et quaslibet litteras causales, demptis tantummodo litteris eorum factum possessionarium tangentibus, coram quibuscumque iudicibus regni nostri et sub quacumque forma verborum loquentes contra sese, hucusque confectas et emanatas, vanas, cassas, frivolas, inanes ac viribus carituras exhibitoribusque earundem nocituras reliquissent et commisissent, immo reliquerunt et se ipsos expeditos commiserunt coram nobis harum litterarum nostrarum vigore et testimonio mediante. Datum Bude in festo Beati Benedicti abbatis, anno Domini millesimo quadringentesimo sexagesimo sexto, regni nostri anno nono, coronacionis vero secundo. [1466. márc. 21.] Coram magistro Dyonisio prothonotario etc.