Nos capitulum ecclesie Budensis memorie commendantes tenore presencium significamus, quibus expedit, universis, quod venerabilis et religiosus dominus Ladislaus, abbas ecclesie Thykoniensis, in sua ac conventus loci eiusdem cum procuratoriis litteris capituli ecclesie Wesprimiensis ab una, ac egregius Emericus, filius Ioseph de Endred, similiter in sua, necnon domine Katherine consortis et puelle Christina vocate, filie eiusdem Emerici, personis, quorum onera et quelibet gravamina in se assumpmendo, ab altera partibus coram nobis personaliter constituti, per eundem dominum Ladislaum abbatem sponte confessum extitit pariter et relatum in hunc modum, quod ipse quoddam predium suum et dicte ecclesie sue Thykoniensis, Appathythelek vocatum, in comitatu Symigiensi in contigua vicinitate possessionis prefati Emerici, Thewrek vocate, existens, habitum simulcum cunctis eiusdem utilitatibus et pertinenciis quibuslibet, terris scilicet arabilibus, cultis et incultis, pratis, fenetis, piscinis et locis piscaturarum, ac generaliter quarumlibet utilitatum integritatibus, quovis nominis vocabulo vocitatis, ad idem de iure spectantibus et pertinere debentibus, prefatis Emerico, filio Ioseph de Endred ac domine Katherine consorti necnon puelle Christina vocate, filie eiusdem Emerici, heredibusque et posteritatibus eorundem universis, nomine et per modum concambialis permutacionis iure perpetuo et irrevocabiliter dedisset, tradidisset et contulisset; econverso vero idem Emericus de Endred sua ac prefatorum domine Katheriue, consortis et puelle Christine, filie eiusdem personis quandam domum suam lapideam, in suburbio civitatis Budensis, in platea Carnificum, in contigua vicinitate domorum circumspectorum Cristanni carnificis a superiori et Iohannis Hortauf dicti, similiter carnificis, iurati civis pretacte civitatis Budensis, cum omnibus edificiis tam lapideis; quam ligneis, in superficie eiusdem habitis, prefato domino Ladislao abbati et dicte ecclesie Thykoniensis successoribusque suis abbatibus similiter iure perpetuo et irrevocabiliter, nomine et per modum concambialis permutacionis dedisset, tradidisset et contulisset, immo partes prescripte, premissis oneribus in se assumptis, dederunt, perpetuarunt et permutarunt coram nobis, assumpmendo nichilominus partes prenotate mutua vicissitudine et alternatim in pacifico dominio eorundem domus et predii ac utilitatum earundem, modo premisso permutatarum, contra quosvis actores et causidicos sese mutuo suosque successores conservare et expedire propriis ipsorum laboribus et expensis. In cuius rei memoriam firmitatemque perpetuam presentes litteras nostras privilegiales pendenti sigillo nostro consignatas ad fassiones parcium prescriptarum duximus concedendas. Datum in festo Sancte et Individue Trinitatis, anno Domini millesimo quadringentesimo quinquagesimo octavo. [1458. máj. 28.]