Ich Ott hern Otten sun von Vischemund und ich Angnes sein hausfraw^e und all unser erben. Wi^er veriehen und tu^en chund allen den, die disen prief lesent oder ho^erent lesen, die nu lebent oder hernach chunftig sind, daz wi^er mit wol verdachtem muet und mit gesampter hant nach rat unser pesten vreunt zu^e der zeit do wir ez mit recht wol getu^en mochten recht und redleich ze chauffen haben geben den erbern geistleichen herren, den prüdern sand Augenstins orden ze Pruk an der Leyta unser gantz haus, daz do leit doselbs ze Pruk aynhalb zenost irem chloster und anderhalb zenost Hansen haus von Go^ettesprunne wn dem vargenanten haus man alle iar dient zurlif wienner phenning zu^e rechtem purchrecht und nicht mer. Daz selb haus hab wier in zechauffen geben umb viertzkk phunt phenning wienner mu^ennzz, der seu uns gar und gantz gewert und gericht habent und umb einen ewigen jartag den seu uns und allen unsern vadern seln begen schullen den seu uns mit irem prief vergwist habent wann der hochgeparn furst hertzog Albert ze O^esterrich, ze Steir und ze Kernden den ergenanten chauf gemacht und gestifft hat nach des rat di wandlung geschehen ist. Also mit auzgenomenr red daz di vargenanten geystliechen herren fu^erbaz ledichleich und vreylich mit dem eegenanten gantzen haus allen iren frumen schaffen schullen mit versetzen und mit verchauffen und geben wem seu wellen und allen iren frumen do mit schaffen schullen wie in aller pest fueg an alle wider red und an all ierrung daz lob wir in zelaisten mit unsern triwen. Wier sein auch ich vargenanter Ott hern Otten sun von Vischemund und ich Angnes sein hausfraw^e und unser erben des eegenanten gantzen hauss der geystlichen herren sand Augenstins orden rechter scherm und gewern fur uns und fur unser erben und fur all ansprach als purchrechts recht ist nach des landes recht ze O^esterrich und waz den selben vargenanten geystlichen herren sand Augenstins orden an dem offtgenanten gantzen haus und an dem scherm mit recht abget, daz schull wier in auzrichten und wider chern und schullen auch daz haben unverschaidenlich auf uns und auf alle dem guet daz wier haben in dem lant ze O^esterrich oder wo wir ez haben, ez sei erbgu^et oder varundguet wier sein lebentig oder tod. Und daz di red und di sach fu^erbaz also staet und unzeprochen beleib. Dor uber so geb wier in disen prief zu^e einem offen u^erchund und zu^e einem warn gezeug diser sach versigeltn mit mein vargenantes Otten insigel hern Otten sun von Vischemund und mit meines vettern Chadolts insigel von Vischemund und mit meines swagers insigel hern Ebergers des Praunstorffer zu^e den zeiten purgraf ze Pruk an der Leyta, die paid diser sach zeug sind mit iren anhangunden insigeln. Der prief ist geben nach Christes gepu^erd dreutzehen hundert iar darnach in dem sechs und funftzikisten iar an sand Jo^ergen tag.