Urbanus episcopus, servus servorum dei, dilectis filiis Vlrico abbati et conventui monasterii Kocwicensis ordinis sancti Benedicti Pataviensis diocesis salutem et apostolicam benedictionem. Exposcit vestre devotionis sinceritas et religionis promeretur honestas, ut tam vos, quos speciali dilectione prosequimur, quam monasterium vestrum dignis honoribus attollamus. Dudum siquidem per nos accepto, quod tu fili abbas et predecessores sui abbates dicti monasterii, qui fuerant pro tempore, baculi pastoralis et anuli usum habueratis, prout tu abbas adhuc habebas, nos tibi abbas, ut quoad viveres et predicto monasterio preesses, etiam mitra pontificali libere posses uti, de speciali gratia duximus indulgendum, prout in nostris inde confectis litteris plenius continetur. Volentes igitur vos et predictum monasterium vestrum favoribus prosequi gratie amplioris vestris in hac parte supplicationibus inclinati, ut tam tu fili abbas quam etiam successores tui abbates predicti monasterii, qui erunt pro tempore, huiusmodi mitra pontificali libere uti possitis felicis recordationis Alexandri pape IIII, que incipit: abbates, et aliis quibuscunque constitutionibus apostolicis in contrarium editis nequaquam obstantibus auctoritate apostolica de speciali gratia indulgemus. Nulli ergo omnino hominum liceat hanc paginam nostre concessionis et voluntatis infringere vel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se noverit incursurum. Datum Rome apud Sanctum Petrum X. kalendas augusti, pontificatus nostri anno quinto (nach Fuchs).