Sacrosancta generalis synodus Basiliensis in Spiritu Sancto legitime congregata universalem ecclesiam representans dilectis filiis .. abbati Cistercii eiusque coabbatibus et conventibus ac monasteriis universis ordinis Cisterciensis salutem et omnipotentie Dei benedictionem. Cum a nobis petitur, quod iustum est et honestum, tam vigor equitatis quam ordo exigit rationis, ut id per ministerium nostrum, quo universali ecclesie afficimur, ad debitum perducatur effectum. Sane pro parte vestra nobis fuit humiliter supplicatum, quatenus vobis et ecclesiis ac monasteriis vestris super privilegiis, indulgentiis, bonis, libertatibus, immunitatibus, consuetudinibus honestis et prescriptis dudum vobis concessis, ut illibata permaneant, robur nostre confirmationis et renovationis adiicere de benignitate nostra dignaremur. Nos igitur, qui pro tuicione et defensione ecclesiarum, bonorum et consuetudinum prescriptarum ac personarum ecclesiasticarum ferventer laboramus, huiusmodi supplicationibus inclinati omnes libertates, gratias, immunitates, prerogativas, consuetudines laudabiles et prescriptas indulgentias, bona, privilegia et indulta a Romanis pontificibus per apostolicas aut alias quascunque litteras vobis et ecclesiis ac monasteriis vestris predictis concessas et concessa necnon libertates et consuetudines laudabiles, exemptiones et salvasgardias secularium exactionum a quibuscunque divis imperatoribus, regibus, principibus vel aliis Christifidelibus vobis et eisdem vestris ecclesiis ac monasteriis indultas, datas et concessas tenores omnium habentes presentibus pro expressis, sicut ea iuste et pacifice possidetis, vobis et eisdem vestris ecclesiis ac monasteriis auctoritate nostra confirmamus illasque et ea renovamus et presentis scripti patrocinio communimus. Nulli ergo omnino hominum liceat hanc paginam nostre confirmationis, renovationis et communitionis infringere vel ei ausu temerario contraire. Si quis autem hoc attemptare presumpserit, indignationem omnipotentis Dei et universalis ecclesie se noverit incursurum. Datum Basilee x Kl. Marcii anno a nativitate Domini millesimo quadringentesimo tricesimo quinto (nach monasterium.net).