Oliverius Sabinensis, Julianus Ostiensis, Johannes Penestrinensis et Georgius Albanensis, episcopi. Jeronimus tituli sancti Grisogoni, Dominicus tituli sancti Clementis, Paulus tituli sancti Sixti, Johannes tituli sancti Vitalis, Johannes Jacobus tituli sancti Stephani in Celiomonte, Laurentius tituli sancte Susane, Ardicinus tituli sanctorum Johannis et Pauli ac Antoniotus tituli sancte Anastasie, presbyteri. Franciscus sancti Eustachii, Raphael sancti Georgii ad Velum Aureum, Johannes sancte Marie in Aquiro, Baptista sancte Marie Nove, Ascanius sanctorum Viti et Modesti ac Johannes sancte Marie in Dompnica, diaconi, miseratione divina sacrosancte Romane ecclesie cardinales. ||
Universis et singulis Christifidelibus presentes litteras inspecturis, salutem in Domino sempiternam. Quanto frequentius fidelium mentes ad opera caritatis inducimus, tanto salubrius animarum suarum saluti consulimus. ||
Cupientes igitur, ut capella beate Marie virginis sita infra limites parrochialis ecclesie sancti Jacobi apostoli in Puechpach, Salczeburgensis diocesis ad quam sicut accepimus nobilis vir Stephanus Lusniczer, dominus temporalis castri Steg, dicte diocesis ac dilecta nobis in Christo Cordula eius uxor singularem gerunt devotionem affectum, congruis frequentetur honoribus et a Christifidelibus iugiter veneretur ac in suis structuris et edificiis debite reparetur, conservetur et manuteneatur necnon libris, calicibus, luminaribus, ornamentis ecclesiasticis ac rebus aliis divino cultui necessariis decenter muniatur, utque Christifideles ipsi eo libentius causa devotionis confluant ad eandem et ad reparationem, conservationem, manutentionem ac munitionem huiusmodi manus promptius porrigant adiutrices, quo ex hoc ibidem dono celestis gratie uberius conspexerint se refectos predictorum Stephani et Cordule nobis super hoc humiliter supplicantium petitionibus inclinati: ||
Nos Cardinales prefati videlicet quilibet nostrum per se de omnipotentis dei misericordia ac beatorum Petri et Pauli apostolorum eius auctoritate confisi, omnibus et singulis Christifidelibus utriusque sexus vere penitentibus et confessis, qui dictam capellam in annuntiationis, assumptionis, nativitatis et purificationis gloriosissime Dei genitricis semperque virginis Marie, ipsiusque capelle dedicationis festivitatibus, et diebus prefatis, quibus id fecerint centum dies de iniunctis eis penitentiis misericorditer in Domino relaxamus, presentibus perpetuis futuris temporibus duraturis. In quorum omnium et singulorum fidem et testimonium premissorum litteras nostras huiusmodi fieri nostrorumque sigillorum iussimus appensione communiri. ||
Datum Rome in domibus nostris sub anno a nativitate Domini millesimo quadringentesimo nonagesimo secundo, die vero ultima mensis augusti, pontificatus sanctissimi in Christo patris et domini nostri, domini Alexandri, divina providentia pape sexti anno primo. ||
J. (oder F.) de Gomiel ||
||
Transkription: Peter Peusquens