Oliverius Sabinensis, Julianus Ostiensis, Johannes Portuensis, Georgius Albanensis, et Jeronimus Penestrinensis, episcopi. Dominicus tituli sancti Clementis, Paulus tituli sancti Sixti, Johannes tituli sancti Vitalis, Johannesjacobus tituli sancti Stephani in Celiomonte, Laurentius tituli sancte Cecilie, Antoniottus tituli sancte Praxedis, et Johannes tituli sancte Susanne, et Baptista tituli sanctorum Johannis et Pauli, presbyteri. Franciscus sancti Eustachii, Raphael sancti Georgii ad Velum Aureum, Johannes sancte Marie in Aquiro, et Ascanius sancti Viti, et Johannes sancte Marie in Domnica, diaconi, miseratione divina sacrosancte Romane ecclesie Cardinales. ||
Universis et singulis Christifidelibus presentes litteras inspecturis, salutem in Domino sempiternam. Quanto frequentius fidelium mentes ad opera caritatis inducimus, tanto salubrius animarum suarum saluti providemus. ||
Cupientes igitur, ut altare confraternitatis Rosarii gloriosissime virginis Marie, situm in conventu Reiccensi ordinis predicatorum Pataviensis diocesis, ad quod sicut accepimus dilecti nobis in Christo confratres confraternitatis artis sutorie eiusdem diocesis singularem gerunt devotionem, congruis frequentetur honoribus et a Christifidelibus iugiter veneretur, ac in suis structuris et edificiis debite reparetur, conservetur et manuteneatur, necnon luminaribus, libris, calicibus et aliis ecclesiasticis ornamentis divino cultui necessariis decenter muniatur in eo, quoque cultus augmentetur divinus utque Christifideles ipsi eo libentius devotionis causa confluant ad idem, quo ex hoc ibidem dono celestis gratie uberius conspexerint se refectos de omnipotentis Dei misericordia ac beatorum Petri et Pauli apostolorum eius auctoritate confisi, omnibus et singulis utriusque sexus Christifidelibus vere penitentibus et confessis, qui dictum altare in singulis, videlicet purificationis, annuntiationis, assumptionis, et nativitatis beate et gloriose semperque virginis Dei genitricis Marie, ac ipsius altaris consecrationis festivitatibus et diebus, a primis vesperis usque ad secundas vesperas inclusive devote visitaverint annuatim, ac ad reparationem, conservationem, munitionem, augmentationem et ad alia opera premissa manus porrexerint adiutrices. ||
Nos Cardinales prefati videlicet quilibet nostrum per se singulis festivitatibus et diebus prefatis quibus id fecerint centum dies de iniunctis eis penitentiis misericorditer in Domino relaxamus presentibus perpetuis futuris temporibus duraturis. In quorum omnium premissorum et singulorum fidem presentes litteras fieri nostrorumque sigillorum iussimus et fecimus appensione communiri. ||
Datum Rome in domibus nostris sub anno a nativitate Domini millesimo quadringentesimo nonagesimo tertio, die vero vicesima tertia mensis martii, pontificatus sanctissimi in Christo patris et domini nostri, domini Alexandri, divina providentia pape sexti, anno primo. ||
Ingheramius ||
||
Transkription: Peter Peusquens