Wir Ferdinand von Gottes gnaden zu Hungernn vnnd Behaým, Dalmatien, Croatien etc. kunig, infant in Hispanien, ertzherzog zu Osterreich, herzog zu Burgundi, zu Brabandt, zu Steýr, zu Kárndten, zu Crain, zu Slesien, zu Lutzemburg vnnd zu Wirtemberg etc. furst zu Swaben, gefurster graf zu Habspurg, zu Tirol, zu Gortz, zu Pfirt, zu Kiburg etc. lanndgraf in Ellsass, marggraf des Heiligen Romischen Reichs zu Merhernn, ob der Enns, zu Burgaẃ vnnd zu Lawsitz etc. herr auf der Windischen Marck, zu Portenaẃ vnnd zu Salins etc., romischer kayserlicher maýestat im Heýligen Reich statthallter etc., ||
bekennen vnnd tun kundt allermenigklich mit disem brief, wiewol wir aus angeborner gute vnnd kunigklicher miltigkait allzeit genaigt sein, aller vnd ýedlicher vnnser vnd vnnserer kunigreiche, erblichen furstenthumb vnnd lannden vnderthanen vnd getreẃen eere, nutz, aufnemen vnnd pesstes furzenemen vnd zubetrachten, so ist doch vnnser kunigklich gemut billich mer begirlich gegen denen, deren vorellternn vnd sý sich gegen weilend vnnsernn vorfaren, auch vnns als irer von Got verordneten vnd gesetzten oberkait, rechten kunig, naturlichen gegeben landesfursten vnnd erbherren in aller schuldiger gehorsam gutwillig erzaigt, vnnd vns als die aufrichtigen vnnd getreẃen vnderthanen in sonderlicher guter bestendigkait, lieb, treẃ vnd naigung angehanngen sein, vnnd solh ir bestendig, aufrichtig vnd vndertenig gemut in den wercken, die solhes warhafftige gezeẃgnuss geben, bewaren vnnd erscheinen lassen, inen zu gnediger erzaigung vnnd erkantnuss solher irer aufrichtigen bestendigkait vnnd vndertenige diennstparkait vor andernn mit vnnsern kunigklichen gnaden vnd freýhaiten zu begaben vnnd zu fursehen. ||
Wann wir nu gutlich angesehen vnnd betracht haben, welhermassen sich vnnser getreẃen lieben burgermaister vnnd rat vnnd der ganntz commun vnnser stat Glurns vorellternn vnnd ýzo sý vor vil langen jaren vnnd zeither gegen weilennd vnnseren vorfordernn erzherzogen zu Osterreich vnnd grafen zu Týrol nit allain neben vnnd mit vnser furstlichen grafschafft Týrol ersamen vnd getreẃen landschafft in allen zugestannden obligen vnnd furfallenden sachen vnnd handlungen in fridlichen vnnd kriegszeitten ýe vnnd all wegen mit darstreckhung irer leib vnnd guter, irem vessten vermugen nach inn aller schuldiger gehorsam ganntz gutwillig vnd vndertenig erzaigt, sonder auch als die gesessnen an den grenitzen gegen iren anstossernn zu yeder zeýt vnnd sonderlich als es die notdurfft in kriegsleuffen erfordert hat, sich nie anderst dann wie frómen, aufrichtigen, bestendigen vnd getreẃen vnderthanen eingeleibten vnd zugetanen landleẃtten zusteet vnnd geburt, an weilennd gedachten vnnsernn vorfaren vnnd bisher vnns vnd derselben vnnser furstlichen grafschafft Týrol sonderlich wol gehallten vnnd damit ir eerlich, lóblich gemut, lieb vnd treẃ inmasen sý vnns vnd inen selbs iren pflichten nach schuldig sein, gnugsam beweist haben, demnach zu erkantnuss solher iren getreẃen wolhaltenns vnnd bestendigen vndertenigkait vnd gehorsam, ||
so haben wir mit wolbedachtem mut, gutem rat, aigner bewegnuss vnnd rechter wissen den bemelten burgermaister, rat vnnd comun derselben vnnser stat Glurns vnnd iren nachkomen in ewig zeit dise besonder gnad getan vnd inen des hernachgeschriben stat wappen vnnd cleinat mit namen ainen schilt nach der lenng in mitten gleich abgetailt, nemlich das vorder tail weiß, darinn ain aufrechter fliegender halber roter adler mit ainem auspraiten swantz, gelber klaen, das gepain seiner flug gelb oder goldfarb geziert, sein gantz haubt aines gelben aufgetanen snabls vnnd ausgeslagner zunngen, gekront mit ainer gelben oder goldfarben kron, vnd das hinder halb tail des schilts in dreý gleichtail vber zwerch, nemblich das vnder rot oder rubinfarb, mitter perlweiß oder silberfarb vnnd oberist tail swartz, alsdann yzgemelt wappen in mitten diss vnnsers kunigklichen briefs gemalet vnnd mit farben aygentlicher außgestrichen sein, von neẃem gnedigklich verlihen vnnd gegeben haben, verleihen vnnd geben inen auch solhes in crafft der sondernn freýhait, damit wir vnnd vnnser haẃß Osterreich desshalben von rómischen kaýsernn vnnd kunigen, auch wir in sonderhait von vnnserem lieben bruder vnnd gnedigen herren kaýser Karlen dem funfften begabt vnnd fursehen sein, vnnd auch aus kunigklicher vnnd furstlicher macht wissentlich mit disem brief, vnnd mainen, setzen vnnd wellen, das nu furbaßhin die obgenantn burgermeister vnd rate das obgeschriben stattwappen in allen vnd ýedlichen eerlichen redlichen sachen vnnd geschefften zu verfertigung vnnd besiglung aller irer brief, henndl vnd schrifften, so von inen als burgermaister vnd rat innamen vnnd von wegen gemainer stat Glurns kunfftigklich aufgericht, ausgeen vnnd verfertigt werden, auch in aufslagen, anmalen vnnd sonst in anndernn eerlichen orten vnnd steten irer vnnd gemainer stat notdurfften nach vnnd zu solhem alle gnad, eer, wirde, vortail, recht, gerechtigkait vnd gewonnhait [ha]ben vnnd sich der inmassen wie annder vnser furstlichen grafschafft Týrol stet, so mit dergleichen freýhait vnnd gnaden auch wappen begabt vnnd fursehen sein, gebrauchen vnd geniessen sollen vnd mugen von allermenigklich unuerhindert, vnnd gebieten darauff allen vnnd ýegklichen des Heýligen Romischen Reichs vnderthanen, auch allen vnnd ýeden vnnsernn fursten, gaistlichen vnnd weltlichen, prelaten, grafen, freýen herrnn, ritternn vnnd knechten, haẃbtleutten, lanndmarschallen, v[itz]thumben, vogten, pflegernn, verwesernn, burggrafen, ambtleẃtten, lanndrichtern, kondigernn der wappen, ernholden, perseuandten, schulthaissen, burgermaisternn, richternn, reten, burgernn, gemainden vnnd sonst allen andernn vnserer kunigreich, erblichen vnnd anderer furstenthumb vnnd lande, vnderthanen vnd getrewen, in was wirden, stands oder wesens die sein ernstlich vnd vestigklich mit disem brief vnnd wellen, das sý die obgenannten burgermaister vnnd rate vnnser stat Glurns an den obgeschriben wappen auch gnaden vnnd freýhaiten, nit hindernn noch irren, sonder sý der wie obsteet gutlich gebrauchen vnnd gentzlich dabeý beleiben lassen vnnd hiewider nit tun noch ýemannds anderm zetun gestatten in kain weise noch wege als lieb ainem ýeden seý vnser swer vngnad vnnd darzu ain peen, nemlich zwaintzig marck lottigs goldes zuuermeiden, die ain ýeder so offt er fráfenlich hiewider tete, vnns halb in vnnser chamer vnnd den andernn halben tail den vorgedachten burgermaister vnd rate vnnser stat Glurns vnd iren nachkomen egedacht vnnachleßlich zu bezalen verfallen sein sol, doch anndernn, die villeicht den obgeschriben wappen vnd cleinaten gleich furten, an iren wappen vnnd rechten vnuergriffen vnd vnschedlichen. ||
Mit vrkundt diss briefs besigellt mit vnnserem kunigklichen anhangenden innsigl, geben zu Gran am neundten tag des monets januarý nach Christi vnnsers lieben herrnn geburt funfzehenhundert vnnd im achtundzwainzigisten, vnnserer reiche im andernn jaren. ||
Ferdinand ss. ||
ad mandatum domini regis proprium J.(ohann) Ferenberger ss. ||
Registrata P.(anthaleon) Vogt ss. ||
[S.P.D.] ||
||
(nach Pfeifer, 2020)