Wir Ferdinand von Gottes genaden römischer Kunig zu allen zeiten merer des Reichs in Germanien, zu Hungern, Behem, Dalmacien, Croacien unnd Slavonien etc. kunig, infannt in Hispanien, ertzherzog zu Osterreich, hertzog zu Burgundi, zu Brabannt, zu Steir, zu Kernndten, zu Crain, marggrave zu Mechern etc., zu Lutzemburg, in Ober- unnd Niderslesien, zu Wirtemberg unnd Tegkh hertzog, furst zu Schwaben, gefurster grave zu Habspurg, zu Tyrol, zu Phirt, zu Kiburg unnd Görtz etc., lanndtgrave in Ellsass, marggrave des Heiligen Romischen Reichs zu Burgaw, Ober- unnd Niderlausitz, herr auf der Windischen Margkh, zu Portenaw und zu Salins etc. ||
bekhennen offentlich mit disem brieve unnd thun khundt allermenigelich, das wir guetlich angesehen unnd wargenomen haben die erberkait, redlichait, guet sitten, tugennt unnd vernunfft, damit unnsere unnd des reichs lieben getrewen Wolffganng, Hanns unnd Jörg die Stainninger gebrueder vor unns beruembt sein, auch dazue die getrewen diennst, die sy sich gegen unns unnd dem heiligen römischen reich unndertheniglich unnd guetwillig erbieten, auch wol thuen mögen unnd sollen, unnd darumb mit wolbedachtem muet, guetem rat unnd rechter wissen denselben Wolffganngen, Hannsen und Jörgen den Stainingern gebruedern unnd allen iren eelichen leibserben unnd derselben erbennserben die hernach geschriben wappen unb klainat mit namen ainen schiltt nach der lenng durchab in zween gleich tail abgetailt, nemlich die hinder weiß unnd vorder feldung schwartz, im grund baider tail des schillts ain drifacher pühel in seiner mitte nach des schillts abtaylung mit seinen farben abgewechselt, als nemlich im weissen schwartz unnd schwartzen tail weiß, auf dem mittern hohern pühel ain Stainrab furwertssteend in seiner mitte gleich auf des schillts farbenabwechßlung, als nemlich sein rechter fueß furgestellt sambt seinem vordern halben thayl in des schillts schwartzen halbirung weiß unnb sein hinnder tail mit seinem lingken hinndergestellten fueß ubergeschwungen flugen unnd schwanntz in der weissen feldung bes schillts schwartz, auf dem schillt ain hellm geziert mit schwartzer unnd weisser helmdeckhen, darauf ein gewundtner pausch zurugkh aus fliegennden binnden, daraus enntspringennd zway püffelhörnner, die mundtlocher offen unnd von einannder gekhert, yedes in seiner mitte abgetaillt, als nemlichen das hintern oben unnd das vorder unnden weisß, zwischen denselben hörnnern ain dreifacher pühel unnd darauf ain stainrab erscheinenndt, bede puhel unnd vogel von obengenannter zwaier farben abgetaillt in allermassen wie im schillt, alsdann dieselben wappen unnd klainat inmitten ditz unnsers gegenwürtigen kuniglichen brieves gemalet unnd mit farben aigenntlicher ausgestrichen sein, von newem genediglich verlihen unnd gegeben, verleihen unnd geben inen die auch also aus römischer kunigelicher macht volkhommennhait hiemit wissenntlich in crafft ditz briefs unnd mainnen setzen unnd wollen das nun furbashin die genannten Staininger gebruder all ir eelich leibserben unnd derselben erbennserben in ewig zeit die obgeschriben wappen unnd klainat haben fueren unnd sich der in allen unnd yegelichen eerlichen unnd redlichen sachen unnd geschefften, es sey in streiten kempffen, gestächen, gefechten, panieren, gezellten, aufschlagen innsigeln, betschaden, clainaten, begrebnussen unnd somist an allen anndern ennden nach iren notturfften willen unnd wolgefallen gebrauchen sollen unnd mugen (…) ||
Mit urkund ditz brieves besigelt mit unnserm kunigelichen anhanngenden insigel. Geben in unnser unnd des heiligen reichs stat Speyr den zwelfften tag des monats octobris nach Christi unnsers herrn geburt tawsenntfunffhundert unnd im ainunddreissigisten, unnserer reichs des romischen im ersten unnd der anndern im funfften jaren. ||
Ad mandatum domini regis proprium J.(ohann) Ferenberger ss. ||
(Text bearbeitet auf Grundlage von: Meindl, Bd. 2, S. 91)