Bonifacius episcopus seruus seruorum dei Dilectis filiis . . Abbati et Conuentui ac Conuersis Monasterii sancte Crucis, Cisterciensis ordinis, Patauiensis diocesis Salutem et apostolicam benedictionem. Deuotionis uestre sinceritas promeretur, ut uotis uestris in hiis presertim, que ad uestrarum Salutem animarum cedere ualeant, quanta cum deo possumus fauorabiliter annuamus. Dudum siquidem felicis recordationis Urbanus papa VI. precessor noster ex certis rationabilibus causis ad id eius animum mouentibus de consilio etiam fratrum suorum, de quorum numero tunc eramus, et apostolice potestatis plenitudine statuit, ut uniuersi Christi fideles uere penitentes et confessi, qui in Anno a natiuitate domini nostri Jesu Christi Millesimo Tercentesimo Nonagesimo nunc instante, tunc futuro, et deinceps perpetuis temporibus de Trigintatribus Annis in Trigintatres Annos Beatorum Apostolorum Petri et Pauli Basilicas de Vrbe ac Lateranensem et Sancte Marie maioris de dicta Vrbe ecclesias uisitarent causa deuotionis, plenissimam omnium peccatorum suorum ueniam consequerentur; ita uidelicet, ut quicumque uellet eiusmodi indulgentias assequi, si Romanus ad minus Triginta continuis uel interpolatis semel saltem in die, si uero Peregrinus aut forensis existeret modo simili Quindecim diebus ad easdem Basilicas et ecclesias accedere tenerentur, prout in dicti predecessoris litteris inde confectis plenius continetur. Cum autem, sicut exhibita nobis nuper pro parte uestra peticio continebat, uos ex singulari deuotionis feruore Basilicas et ecclesias predictas, ut indulgentiam huiusmodi assequi possetis, in propriis personis libenter uisitaretis, sed quia propter uiarum pericula et aliis certis de causis desiderium uestrum huiusmodi commode adimplere non potestis, pro parte uestra nobis fuit humiliter supplicatum, ut super hoc uobis prouidere de benignitate apostolica dignaremur. Nos igitur uolentes, uos promissorum intuitu fauoribus prosequi, gratiosis huiusmodi supplicationibus inclinati, ut Confessor, quem quilibet uestrum duxerit eligendum uobis apostolica auctoritate concedere ualeat, quod uos uere penitentes et confessi indulgentiam huiusmodi assequi ualeatis‚ Ita tamen, quod idem Confessor laborem et expensas, quos pateremini, si propterea ad Vrbem predictam ueneretis, in alia pietatis opera uobis commutet et oblationes, quas ad Basilicas et ecclesias predictas oblaturi fuissetis, si ad illas personaliter uenissetis, ad eas sine dilatione transmittatis et loco uisitationis Basilicarum et ecclesiarum predictarum aliquas ecclesias in partibus illis, uobis per dictum Confessorem deputandas, Quindecim diebus continuis uel interpolatis saltem semel in die infra Annum huiusmodi, si commode poteritis, Alioquin infra festum Resurectionis eiusdem domini nostri Jesu Christi proxime uenturum uisitare teneamini, deuotioni uestre tenore presentium indulgemus, Nulli ergo omnino hominum liceat hanc paginam nostre concessionis infringere, uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli Apostolorum eius se nouerit incursurum. Datum Rome apud Sanctum Petrum VI° Idus Decembris, Pontificatus nostri Anno Secundo. (nach Weis)