Ich Philman Kapenbecher vnd Else min eliche wirtinnen von Swedelbach veriehen vffenliche an dysem brieve, daz wir gesatzet han den erbern geystlichen luden dem . . abpte vnd dem convente von Otterburg ein clein malter korn geltes ewic- liche off allen dem gude, hus vnd hof, vnd waz wir han, daz mich die vorgenannt Else ane ist gevallen von Hunen minem vater seligen, oder anders waz wir zu Swedelbach han, ez sei clein oder groz, zu eime rechten selgerede vor vns vnd alle vnser altforderen sele; also daz wir nit danne eine firnzal sol len geben, die wilche daz wir leben ; nach vnserme dode, wer danne daz vorgenannt gut hette, der sol in alle iar daz vorgenannt malder korn geltes reichen vnde geben» Des zu eime waren orkunde so han wir gebeden den erbern geystlichen herrn den probest zu Lutern, daz er sin ingesigel an dysen brief hat gehangen. Und wir der vorgenannt probest erkennen vns, daz wir dorch bede willen des egenannten Phil., vnde Elsen siner elichen wirtinnen vnser ingesigel an dysen brief han gehangen ; der do wart gegeben, do man zalte nach Gots geburthe druzehenhundert in dem zwei vnd virzigestem iare, an dem fritdage vor vnser frauwen dage, alse sie geborn wart.