Wir Schoffrid, grave zu Liningen vnde Iohanna, vnser elich gemechede, dun kunt allen den, die dysen gegenwortigen brief sehent oder horent lesen, daz wir zu eime rechten selgerede vnser vnd vnser kinde vnde vnsere altfordern dem closter vnd den geistlichen luden von Otterburg den wazzerfluz, der zu der deinen Bockenheim vber den weg of iere mule, die in irme garten stet, fluzzet, han gefriet bit gesammenter hant, also daz der vorgenant wasserfluz of die vorgesprochene mule vber den weg ane alle widersprache vnser vnd vnser nachkummelinge nu vnd vmonerme vliezende sy. Wir, sagen auch an dysem brieve alle vnser scholtheizen vnde vnser scheffene, die dar nachfragen, oder dar vf sprechen solten, irs eydes ledig an dem ende vnde gebieden ien vnde auch den gesworn, daz sie nummerme darnach gefragen noch orteil daruber gespre- chen; also daz die vorgenant geistlichen lude von Otterburg an dem vorgesprochen wasserflozze, den wir ien alsus gege- bin vnd gefriet han, nu vnd vmmerme geruwecliche sitzende bliben. Daz daz vmmerme stede vnde vngebrochen blibe, so han wir gegeben dysen brief den vorgenant hern von Otter burg besigelt bit dem ingesigel vnserer graveschaft vnd vnser herschaft. Dirre brief ist gegeben nach vnsers hern geburte dusent ier druhundert iar in deme siebenden iare, darnach an sancte Iohann dage.