Wir Busse vnd Herman gebrudere von Elstirborg genant. bekennen vffentlichen an deseme keinwer- digen brive vnde tun kunt allen di en sehen oder horen lesen, das wir en treuwen gelobet haben vnde geloben an deseme keinwerdigen brive an eines geschwornen eides stat den ersamen lutin, den ratismeistern, dem rate vnd der gemeinde der stat zu Molhusen, das wir alle gelobede vnde verbuntnisse, die vnser über her bischoff Henrich von Nuwenborg vnde sin capittel zu Nuwenborg, vnde lybin frunt, Heinrich der eldere voit von Plawe den man nennet den langen vnde Heinrich sin eldere son, Heinrich voit von Plawe, Russe genant, vnde Heinrich sin son, Heinrich von Waidenburg, Johannes sin son, vnde burggreve Otto von Lysnig, den edelen herrin greven Frideriche von Orlamunda herren zu Wymar, greven Gunther von Schwartzborg, deme elteren, greven Henriche vnde greven Frideriche sinem sone, herren zu Bychelingen, greven Frideriche von Bychelingen herren zu Ko tenborg, vnde den erbaren luten den ratismeistern, den reten vnde der gemeinde der stete zu Erfforte vnde zu Molhusen, getan vnd gelobet haben vnd ore brive gegeben haben, den vorgenanten burgern vnde der gemeinde der stat zu Molhusen stete vnd veste halten schullen vnde wollen bey einem geswornen eyde, ane argelist

funff gantze jar von allermanne fastenacht die nehest kommen, vnde haben on dissen brif gegeben darubir zu eime gezugnisse vnde vnse insigile daranne gehangen, da man zalte nach gotes gebort tusent jar dryhundert jar in deme vir vnd dreyssigstem jare au deme nehisten suntage vor allerheiligen tage.