Evgenivs Episcopus seruus seruorum Dei Rathfredo sanctae Fauianensis Ecclesice et Methodio Ecclesiae speculi Juliensis, quae et Suguturensis nuncupatur, atque Alehvvino sanctae Nitrauiensis Ecclesiae parique modo Annoni sanctae Vetuarensis Ecclesiae Episcopis, simul etiam Tvttvndo nec non Moymaro Ducibus et optimatibus exercitibusque plebis Huniae, quae et Auaria dicitur et Marauiae. Desiderio salutis animarum vestrarum filij in Christo charissimi cum audiuimus Christianissimam conuersationem vestram et sanctae fidei bonorumque operum vestrorum processum, summo gaudio atque laetitia fuimus exhilarati, quia diuina in nobis operante clementia, vt Apostolus ait: vbi habundauit delictum, ibi superhabundat gratia; atque quomodo sancta Dei Ecclesia nostris temporibus quotidianum in electione vestra suscipit incrementum. Cuius optabilis moris index fuit reuerendissimus Yrolphvs sanctae Lauriacensis Ecclesice Archiepiscopus et sanctissimus frater noster, vester antem spiritualis pater, qui per suam sanctam praedicationem adoptiuos Deo vos genuit filios. Is itaque ad Apostolorum limina orationis causa veniens nouam Ecclesiam nostris Apostolicis benedictionibus informandam subnixe commendauit, quam domino auxiliante Catholice gubernandam in vestris partibus suscepit, jn quibus etiam quondam Romanorum quoque Gepidarumque aetate, vt e lectione certum est, in septem Episcoporum parochias antecessores sui iure Metropolitano obtinuerant dioecesin. Qua igitur ex iustitia et lege praefatus Deo dignissimus Archiepiscopus debito obligatur, vt illi terrae prius Christicolae atque suorum antiquitus antecessorum creditae prouidentiae, quam nunc vos Dei Omnipotentis occulto mediante iudicio velut haereditariam possidetis ipse Euangelicus agricola diu negata caelestis spargat semina vitae atque in lucrandis Christo animabus rediuiuam de vobis nutriat segetem; Quem uero doctissimum diuini Oraculi ministrum saluti vestrae cognoscentes per omnia necessarium fide et exemplo probatum merito erga illum Apostolicam seruantes sententiam, qua dicitur: Quomodo credent sine praedicante aut quomodo praedicabunt, nisi mittantur? ab hac sancta Romana matre Ecclesia vobiscum Rectorem transmisimus atque in praefatis regionibus Hunnia, quae et Auaria appellatur, sed et Marauia prouinciarum quoque Pannoniae siue Mesiae Apostolicam vicem nostram et dioecesim atque ius Ecclesiasticum exercendi et vsum ac potestatem antecessorum suorum, videlicet sanctae Laureacensis Ecclesiae Archiepiscoporum, sibi successoribusque suis canonica authoritate committimus atque huius constitutionis nostrae decretum subscriptionis priuilegio roboramus. Pallium praeterea iuxta consuetudinem antiquam sanctitati suae dedimus, quod ita sibi concessimus, sicut praedecessores nostri suis praedecessoribus concessere, priuilegiorum suorum scilicet integritate seruata; Cuius dilectioni quamuis hoc debito permitteremus, propter vestras autem petitiones super hac re flagitantibus ad honorem suum nostram Apostolicam vicem et auctoritatem insuper accumulauimus, quod nunquam suis permissum est prioribus. Quatenus et vos Confratres et Coepiscopi deinceps ei reuerentiam ampliorem exbibere sciatis et in sana doctrina coelestis eruditionis ad aedificationem vestram vt filij sapientes obediatis atque vos laici primates et vulgus saluberrimus praeceptis suis non velut homini sed tanquam Deo humiliter obtemperetis et in fide Catholica, quam per Dominum Jesvm consecuti estis, fortes permaneatis. Nam totius doli artifex Diabolus, cuius dominio et pompis in Baptismate abrenunciastis, iacturam et damnum vestrae salutaris surreptionis moleste patitur ac per varias occasiones Zizaniam perfidiae seminando velut multa iniuria bachatur et vt vestrum aliquis terga vertat sanctae professioni incessanter molitur. Quapropter saepe dicti Archiepiscopi videlicet Pastoris vestri a Deo destinati institutionibus benignas aures prabete, qui vos et versutiam Sathanae cauere atque eius aeternos cruciatus euadere instruit ac ipse in die iudicij de bonis operibus vestris seculorum Domino perpetua remunerandos gloria praesentabit. Ad perfectam autem et necessariam eruditionem vestrae salutis, vt comperimus, non sufficiant pauci, qui modo constituti sunt vobis Episcopi, quia plures sunt adhuc gentilitatis errore ibidem detenti, ad quos propter inopiam praeconum diuini verbi nondum peruenit notitia Christi. Idcirco enim, vt accrescat turba fidelium, studeat solertia vestra pro mercede et remissione peccatorum vestrorum adminiculum atque iuuamen praebere Reuerendissimo Yrolfo Archiepiscopo, quatenus dudum illic constitutorum Episcoporum numerus impleatur, qui congrue constituti et vobis posterisque vestris poterunt esse proficui, si ad restaurationem Ecclesiarum propter nomen Domini de possessionibus vestris, quas reditus dotesque earum fama diuulgante quondam fuisse noueritis aeternam sufficientiam vobis comparantes eisdem Ecclesiis ipsi conferatis idoneis viris ad hoc ministerium electis maxime in illis locis, si opportunitas et vtilitas commendauerit; ordinentur antistites, vbi indicia Ecclesiarum et aedificiorum Sedes Pontificales olim fuisse demonstrant, sin autem illius arbitrio et deliberationi, qui vel vbi disponantur Episcopi, concedimus, cui vicem nostram apud vos Ecclesiastici regiminis per omnia commisimus. Bene valete.

Source Fulltext: OÖUB 2 (Wien 1856), S. 700-702