Dilectissimis nobis in Christo filijs Hrodberto sanctae Moguntinae Ecclesiae et Diotrico sanctae Treuerensis Ecclesiae atque Adalberto sanctae Magdeburgensis Ecclesiae, parique modo Geroni sanctae Coloniensis Ecclesiae atque Friderico sanctae Juuauensis Ecclesiae, sed et Adalgago sanctae Bremensis Ecclesiae Archiepiscopis; Pariterque Domino Ottoni gloriosissimo Imperatori Augusto atque nepoti suo Henrico praecellentissimo Duci Bauariorum, Caeterisque omnibus Episcopis et Abbatibus, Ducibus atque Comitibus Galliae atque Germaniae Benedictus diuina gratia praeditus Apostolicae sedis Pontifex, seruus autem seruorum Dei in Domino salutem. Oportet iustis supplicationum petitionibus nos semper faciles et humiles exhibere et praecipue cum fraternis religiosorum consacerdotum precibus sollicitamur, qui passim ab omni mundi termino tenorem et regulam atque proprij officij vigorem ab hac vniuersali sancta Romana matre Ecclesia eiusque sortiuntur Ministro, Vicario scilicet beati Petri Principis Apostolorum, cuius quamuis indigni eiusdem tamen gratia et dono potestati successimus et ordini, cui voce dominica dicitur: Tu es Petrvs et super hanc Petram aedificabo Ecclesiam meam. Quapropter dignum aestimabimus assensum praebere congruis postulationibus Reuerendissimi Archiepiscopi, quas per probabiles personas nobis intimauit responsalium suorum duorum praesbyterorum, quatenus sibi pallium et Metropolitanum honorem Cathedrae suae, sanctae Lauriacensi Ecclesiae restitueremus confinio Vngrorum adiacenti, quod omnino nos eidem Ecclesiae debere testantur antiquissima secum apportata priuilegiorum testimonia; In quibus enim continebatur, quod aetate Pontificatus beati Symachi huius almae sedis apostolici Praesulis praefata sancta Lauriacensis habetur Ecclesia Metropolis et in quantum tam exinde quam etiam de passionibus beatorum Martyrum, qui illic plures in tempore persecutionis pro fide Christi variis sunt tormentis mulctati colligere possumus ex omnibus Ecclesiarum Dioecesibus Pannoniae haec antiquitate et Archiepiscopij dignitate esse primitiua creditur, quae iam multis retrò actis temporibus ex vicinorum frequenti populatione barbarorum deserta et in solitudinem redacta nullum Christianae professionis habitatorem meminit, Vsque dum inuictissimus Augustus et pater patriae genitor quippe pii Imperatoris nostri, quem adhuc superesse et diu dominari mundus exoptat, bellico trophaeo eorum vires retundit. Nunc autem quamobrem votis exultantibus in laudem omnipotentis Dei erumpimus; non solum saepe dicta sancta Lauriacensis Ecclesia hostium cessante terrore cum accolis suis pace et tranquilitate potitur, verum etiam ipsi dudum inimici illum, quem persecuti sunt more gentili, iam iam Christum baptizati profitentur et sacerdotes modo habere desiderant ac, prout scire rudes poterunt, venerantur et Ecclesias quasdam in sua terra, quas patres incendio dederunt, posteri restaurare videntur. Hac ergo suadente ratione, quod praenominati sanctae Lauriacensis Ecclesiae Archiepiscopi postulatio antiqua Apostolica authoritate commendatur et praeterea quod cum istum esset, pariter etiam vtile visum est, vt ad fructificandas Deo gentes ex nouitiis cultoribus fidei Vngrorum atque Marauorum siue etiam aliis multis prouinciis Schlauorum suae parochiae finitimis illic ordinatis Episcopis, secundum quod antiquitus dispositi erant, eis nunc constitueremus Archiepiscopum. Quoniam autem Salisburgensis Ecclesia Metropolis abusa est subiectione sanctae Lauriacensis Ecclesiae Pontificij obliterata et attenuata sua dignitate ex deuastatione Barbarorum, quam propterea perceptis Apostolicis priuilegijs nequaquam patimur priuari, cum et priora sint Salzburgensibus et ideo auctoritatiua vel auctorabiliora; Quae conditio testimonij etiam apud secularia iudicia viget et praevalet. Nos vero in huiusmodi constitutionibus omnem calumniam atque contentionis occasionem Domino adiuuante facile propulsamus, ambabus parochijs ab inuicem certis limitibus sequestratis et tamen Apostolicis sanctionibus vbique stabilitis, quas nostrum est semper defendere et secundum Euangelicam sententiam nihil ex eis soluere sed adimplere. Vnde ergo auctoritate et potestate beati Petri Principis Apostolorum atque exemplo beatorum Pontificum scilicet praedecessorum nostrorum eandem sanctam Lauriacensem Ecclesiam eiusque rectores iam Archiepiscopos ammodo perpetim ab omni Salisburgensis Ecclesiae eiusque Praesulum subiectione ac ditione absoluimus et honore Metropolitano sublimamus et sicut modernis temporibus sanctae memoriae Agapitvs Papa terminos earundem parochiarum ab inuicem distinxit, sic et ipsi diffinimus ita quoque, vt sancta Salzburgensis Ecclesia superioris Pannoniae Episcopos habeat suffraganeos, quibus ysque huc sui Pontifices praeesse videbantur, cum tanta talique dioecesi, quali hactenus in inferiori vsi sunt Pannonia. Sancta autem Lauriacensis Ecclesia in inferioris Pannoniae atque Mesiae regiones, quarum prouinciae sunt Auaria atque Marauia, in quibus septem Episcoporum parochiae antiquis temporibus continebantur, suique antistites Archiepiscopalem deinceps habeant potestatem cum tanta talique dioecesi, quali hactenus in superiori vsi sunt Pannonia. Quibus vtique iam praeceptis insuper iniungimus, vt iuxta beati Gregorij decretum Anglorum Archiepiscopis directum alter illorum, qui prior sit in ordinatione tempore, et quoad viuat prioratum teneat in ordine; Penitus enim determinatis vtriusque Ecclesiae dioecesibus omnique exclusa altercandi occasione canonica sub districtione interdicimus, vt neuter earundem Ecclesiarum Archiepiscopus inuadere alterius parochiam praesumat vel quibuscunque jurgiis aut disceptationibus super diffinitis à nobis modo rebus alter alterum sollicitare audeat. His igitur sedatis venerabilem confratrem nostrum Pilgrinum Archiepiscopum canonicis literis munitum sedi sanctae Laureacensis Ecclesiae suae intronizauimus palliumque ei secundum antiquum eiusdem Ecclesiae vsum direximus atque in prouinciis Auariae et Marauiae, regionum quoque inferioris Pannoniae siue Mesiae et in contiguis sibi Schlauorum nationibus circumquaque manentium nostram Apostolicam authoritatem et vicem exercere committimus atque delegamus, quatenus illic more antecessorum suorum sanctae Laureacensis Ecclesiae Archiepiscoporum habeat potestatem Presbyteros et Episcopos ordinare atque constituere et ex praedictis gentibus sua sancta praedicatione parare Domino plebem perfectam.

Source Fulltext: OÖUB 2 (Wien 1856), S. 715-718