Gregorius Episcopus seruus seruorum dei dilecto fratri in christo Ältmanno patauiensi episcopo et per eum ecclesie, quam in territorio eiusdem ciuitatis in portu eni fluminis construxit et in honore sancte trinitatis et resurrectionis domini nostri iesu christi et sanctorum Andree apostoli, pantaleonis Martyris et sancti Nycolai confessoris consecrauit, in perpetuum, Conuenit apostolico moderamini religiosis desideriis et peticionibus ea benignitate et pietatis studio condescendere effectumque prebere, ut, dum spiritualis auctoritas officii sui debitum peragit, dum pia fidelium statuta roborando uenerabilibus locis presidium defensionis inpendit, hinc affectus superne retributionis lucretur meritum, quod in prestando beneficio non minor fuit karitas quam potestas. Hoc enim et bonorum studiis spe proficiendi augmentum tribuit et opus proprium fructu perfectionis deo acceptabile reddit. Itaque dilecte frater, carissima sancti Petri filia Imperatrice Agnete semper Augusta indicante nobis te in suburbio ciuitatis tue iuxta portum predicti fluminis eni ad communem et regularem uitam ecclesiam construxisse et ut eam iuxta propositum tue deuotionis constitutionis apostolice priuilegiis firmaremus, tum ipso pro te sanctissimo desiderio postulante tanto promptius utriusque uoluntati annuendum esse iudicauimus, quanto et tua uota iusta esse certius intelligimus et illius desideria diuino accensa spiritu ubique prosperari cupimus. Concedentes igitur tibi et prefate ecclesie huius nostri apostolici decreti priuilegium sanctimus et apostolica auctoritate statuimus, ut clerici, qui uel nunc in eadem ecclesia sunt ordinati uel aliquo post in tempore fuerint ordinandi, sub communi semper uita et claustrali conuersatione consistant. Ad quorum communem usum confirmamus et incommutabiliter tenenda decernimus determinate quidem et ea, que prenominata imperatrix augusta pro remedio anime sue donauit uidelicet nonam partem omnium, que ad persinbiugen ad manus suas culta redduntur et ea, que tu ipse per manum aduocati tui Rainberti illuc tradidisti, scilicet antesignatum portum predicti fluminis eni cum omni utilitate sua gratis quidem transponendis, qui causa orationis uadunt. Insuper duas curtes Semftelingen et Niuwenhouen cum omnibus pertinentiis et unam houesacham, quam Egeno ad usum episcopi dedit, et unum mansum et dimidium ad steinuelde et tres houesachas in loco, qui dicitur Alburch et decimationem eius uille cum uno manso et unam curtim Encinwis cum genezeo et omni utilitate et tres houesachas de Ebechendorf cum omni utilitate. Ad richeresdorf I. mansum et I. molendinum. Ecclesiam I. que dicitur Eitinbach, et I. decimationem in barrochia Ho^utaren et I. houesacham ad O^usta cum ceteris bonis illuc pertinentibus, Et ad allinchouen I. mansum cum decimatione eiusdem ecclesie, Ad Rustam decimationem, Ad Liuben I. uineam, Ad Mutaren I. mansum, ad Walcho^uuue II. uineas, Ad sconenbo^uhel II, Ad Ascha II. Et III. sagenas, unum patauie et aliam sebach, terciam Mathse. Pro uestitu autem XXIV. libras, X. de nauibus, VI. de Goldarewerde, IV. de Euirdingin, III. de censu Mathse, I. de Vfhusen et molendinum in eodem loco, Vnam houesacham ad Roingerisdorf, I. peringen, O^uinkirichen et Altheimin cum omnibus pertinentiis suis, I. Gerichwis, I. Heimingen, I. decimationem Ro^utprehtishouen, II. uineas Liumuntingen, I. ecclesiam cum decimatione Griezkirichen et I. houesacham Kaltinbach, decimationem in rure biugin, item decimationem Zo^uintis. Hec inquam omnia et quecunque etiam innominata bona eidem ecclesie uel nunc iuste collata sunt uel inposterum deo disponenete conferenda, eo tenore et auctoritate ad communem usum fratrum ibidem deo famulantium decernimus et corroboramus, ut communem et regularem uitam ducentes nichil de bonis ecclesie proprio et singulari usui uendicent. Si quis vero imperatorum, regum, sacerdotum, clericorum iudicum ac religiosarum personarum hanc coristitutionis nostre paginam agnoscens contra eam uenire temptauerit, potestatis honorisque dignitate careat reumque se diuino iudicio existere de perpetrata iniquitate cognoscat et nisi ea, que ab illo sunt male ablata, restituerit uel digna penitentia illicite acta defleuerit, a sacratissimo corpore ac sanguine domini redemptoris nostri iesu christi alienus fiat atque in extremo examine districte ulcioni subiaceat. Cunctis autem eidem loco iusta seruantibus sit pax domini nostri iesu christi, quatenus et hic fructum bone actionis percipiant et apud districtum iudicem premia eterne pacis inveniant. Datum Rome per manus Petri presbiteri cardinalis ac Bibliothecarii IX. Kalendas Aprilis anno Pontificatus domni gregorii pape VII, Indictione XIII.

Source Fulltext: OÖUB 2 (Wien 1856), S. 103-104