In nomine summe et indiuidue trinitatis. Liupoldus Dux Baioarie. Quoniam negociis secularibus implicati deo per nos ad summam placere nequimus, eos, quos fideles et maxime mundialibus exemptos studiis probamus, congregare, uenerari, diligere, fouere et modis omnibus eorum paci et quieti inuigilare debemus. Hoc enim modo fit, ut et de nobis deo misericorditer prouidente et presentis uite incolumitas, temporum tranquillitas ac omnimode pacis et salutis prosperitas magis ac magis letis successibus arrideat nobis et que in futuro ipsis reposita sunt in celis nisi usquequaque meritis ipsorum adiuti et precibus priuabirnur bonis. Quapropter domine Gotescalce abba de sancta cruce, quem loco patris amplectimur, tuis sanctissimis et dignissimis annuentes peticionibus locum, quem nobilis homo Otto dictus de Machlant deo sancteque dei genitrici ac semper uirgini Marie et sibi famulantibus ordinis cisterciensis monachis per te contradidit, sub nostri mundiburdii patrocinium suscipimus et hac nostre defensionis Karta deo inibi seruitorum paci et quieti in perpetuum prouidemus. Et quia tua hoc a nobis expostulat paternitas, locum ipsum cum omnibus suis pertinentiis et terminis, in quibus datus est, hac ipsa nostre confirmationis et attestationis pagina, sicut sub nostra bis terque designatus est presencia, annotari et caute circumscribi fecimus. Igitur predictus liber homo castrum suum Pongartinberch dictum diuino, ut diximus, cultui super reliquias sancti Jacobi aliorumque sanctorum potestatiua manu cum his terminis obtulit, sicut uidelicet ad occidentem influxit (sic) que dicitur uetus Timnich, nemus eidem castro contiguum cum ipso nemore, quidquid in eo sui iuris dinoscitur fuisse sine omni exceptione. Dedit etiam predium Modminsdorf nuncupatum ad orientem quidem cuidam matrone Elisabeth conterminum, ad occidentem uero Lawarin habens confinium et ad austrum ab utroque termino finitur in danubio, cum ecclesiis duabus, cum molendinis, terris, campis, pratis, pascuis, siluis, aquis aquarumque discursibus (sic) et prorsus cum omnibus, que hactenus iure inibi possederat ipse, et cum his, que ad ecclesiam sancti Jacobi siue infra siue extra hos terminos pertinent. Preterea sursum iuxta Nardum terre deserte et inculte XXX. mansos illuc delegauit. Hec igitur, que prenominata sunt, testamur nostre sollicitudinis mediante presencia, iuste et legitime ad prefatum diuinum seruicium collata et huius presentis pagine scripto communimus, quam proprio sigillo insigniri fecimus. Igitur quicumque qualecumque de supradictis temerare temptauerit, iuxta cita (sic) legum et leges earum, que nostro subiacent regimini, prouinciarum nos ultores erimus in eum. Huic sollemni donacioni testificantur Liutoldus comes, Conradus comes de pilstein, Gebehardus comes de Purchusin, Walchun eiusdem Ottonis frater, Otto de lenginbach et Heinricus frater suus. Anno ab incarnacione Verbi caro facti M.C.XLI. Indict. IIII. apud nouam Ciuitatem feliciter sunt hec in Christo acta. Amen.

Source Fulltext: OÖUB 2 (Wien 1856), S. 192-193