In nomine sancte et indiuidue Trinitatis. Fridericus diuina fauente clementia Romanorum imperator augustus. Si ecclesias Dei locupletare uel easdem locupletatas in statu suo conseruare studuerimus, nostre salutis augmentum et non modicum reipublice emolumentum fore credimus. Quare uenerabilis et dilecte nobis Eberharde Babenbergensis episcope, cum ecclesia Babenbergensis, cui auctore Deo presides, in plerisque tua industria feliciter non solum in spiritualibus sed etiam in temporalibus a Domino incrementum accepit, iustis tuis petitionibus libenter annuentes eximimus ab omni iure feodali castra, que in tuo dominio absolute habere dinosceris, tam ea, que ante tempora tui pontificatus habuit ecclesia tua, quam postmodum tua sollertia adepta est, que suis nominibus subnotare decreuimus: Rotenstein, Gozwinestein, Wincera, Grivena de antiquo, de novo autem Giecheburc, Liechtenuels, Wassenberc, Nordegga, Chunstat, Northalden, Franckenburc, Hostete, Veterona, sane illa conditione, que de Giecheburc veteri et Liechtenuels cum suis pertinentiis et accessionibus facta et nostra auctoritate confirmata est comiti Bertholdo et uni tantum filio suo, si superstes extiterit, in ipsis eisdem personis absque successione modis omnibus finem habitura. Hec igitur et alia si qua pro necessitatibus ecclesie tue, cuius bona late dispersa sunt, vel edificaveris vel aliter opitulante Domino adeptus fueris, ecclesie tue ea lege speciali et uinculo iuris innodamus, ut nulli successorum tuorum potestas et licentia sit aliquid ex his infeodare aut sub colore castrensis beneficii vel alio quolibet malo ingenio a priuatis usibus episcopii alienare. Quod si quis ausu temerario contra hoc facere attemptare tentauerit, pro infecto habeatur; ipse, quidem auctor huius nequitie velut sal insulsum foras proiciatur et conculcetur ab hominibus, ipse vero, qui receperit, privetur beneficio et LX. librarum auri mulcta condempnetur, medietate fisco nostro persoluenda, reliqua uero parte ad altare beati Petri in Babenbergensi sacrario ibidem inferenda. Vt autem firma et inconuulsa omni tempore huius rei perseueret auctoritas, presentis scripti adnotatione et sigilli nostri per Dei gratiam inuiolabili confirmatione corroborari precepimus. Signum Domini Friderici Romanorum imperatoris inuictissimi. Ego Regenaldus Coloniensis ecclesie electus et Italie archicancellarius recognoui. Datum Papie XVI. Kal. Mart. indictione VIII. anno dominice incarnationis MCLX. regnante domino Friderico Romanorum imperatore glorisissimo anno regni eius VIII. imperii vero V.

Source Fulltext: OÖUB 2 (Wien 1856), S. 301-302