Alexander episcopus seruus seruorum dei dilectis filiis fridrico decano patauiensi ecclesie fratribus tam presentibus quam futuris canonice substituendis. Quotiens a nobis aliquod petitur, quod religioni et honestati conuenire dinoscitur, animo nos decet libenti concedere et petencium desideriis congruum impertiri suffragium. Ea propter dilecti in domino filii uestris iustis postulationibus clementer annuimus et prefatam ecclesiam, in qua diuino mancipati estis obsequio, sub beati Petri et nostra protectione suscipimus et presentis scripti patrocinio communimus Statuentes, ut quascunque possessiones, quaecumque bona eadem ecclesia in presentiarum iuste et canonice possidet aut in futurum concessione pontificum, largitione regum uel principum, oblatione fidelium seu aliis iustis modis prestante domino poterit adipisci, firma uobis uestrisque successoribus et illibata permaneant. In quibus hec propriis duximus exprimenda uocabulis, uidelicet duas curtes uillicales in Rudelheim, Parrochiam in chorpeheim et ecclesiam, que dicitur hohenstat, cum pertinentiis suis, quas Reginmarus episcopus ecclesie uestre contulit, Predia in uilla viethpach, que Hartwicus de Hagenawe uobis pro remedio anime sue et in recompensatione thesauri, quem Reginbertus episcopus frater eiusdem H. de sacrario uestro accepit, tradidit; Ecclesiam sancti Stephani de wachreine et ecclesiam Swainah et ecclesiam pecenchirchen cum pertinenciis suis, quas episcopus chunradus uobis contulit; Ecclesiam Ovhalmingen cum pertinenciis suis, Parrochiam sancti Pauli patauie cum pertinenciis suis, villis videlicet et ortis ciuitati adiacentibus, quam episcopus theobaldus uobis contulit, Predia vihehouen, Mosin, vechelahebrucke, Rinderholz, Hafte, Eingelwartesheim, Madelgeredorf, Mitterenhirsen, Oberendorf, Owenheim, Odelberingen, willingen, sectionem lignorum cum pascuis in foresto iuxta ciuitatem sito; Predia Galewis, veltchirchen, Strachin, Endsingen (edsingen), Hartperch, visenhart, Suwaine, Chovnelbach, Igilbach, Lagarn, Rainbach, Tanheim, Hovnthvbten, Ospirinberge, Pucingen, Hezelingen, Aiche, Raphaltesteten, Subenne, Sunnenbach, Ingelbach, Langaredorf, Landindorf, Gerrichesdorf, Frienberge, villam chazelinesdorf et decimas de uineis et agris uestris ibidem prouenientibus, decimam apud Chvnehohesteten. Ad hec auctoritate apostolica inhibemus, ut episcopo uestro, qui pro tempore fuerit, possessiones aut alia bona uestris stipendiis deputata sine communi assensu capituli uel maioris et sanioris partis infeudare non liceat uel alio titulo alienare. Interdicimus etiam, ut contra consuetudinem hactenus obseruatam famuli uestri, donec eos ad iusticiam exhibendam cogere uolueritis, ad examen iudicis ciuitatis minime pertrahantur Deputatis infra terminos designatos contra assignationem et concessionem Chunradi quondam Patauiensis episcopi preter canonicos ordinare uel disponere quipiam nullus attemptet. De redditibus uero ad prebendas canonicorum pertinentibus nonnisi decano et fratribus, sicut prefatus episcopus de communi assensu capituli decreuisse dinoscitur, disponere liceat nec in his contra uoluntatem uestram quisquam specialem sibi uendicet potestatem. Statuimus preterea, ut, si quisquam canonicorum intestatus decesserit, facultates, quas ratione officii uel ecclesie adeptus fuerat, communi fratrum et ecclesie usui applicentur. Decernimus ergo, ut nulli omnino hominum liceat prefatam ecclesiam temere perturbare aut eius possessiones auferre uel ablatas retinere, minuere seu quibuslibet uexationibus fatigare, sed omnia integra conseruentur eorum, pro quorum gubernatione et sustentacione concessa sunt, usibus omnimodis profutura salua sedis apostolice auctoritate et diocesani episcopi canonica iusticia. Siqua igitur in futurum ecclesiastica secularisue persona hanc nostre constitutionis paginam sciens contra eam temere uenire temptauerit, secundo tercioue commonita si non satisfactione congrua emendauerit, potestatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore et sanguine dei et domini nostri Jesu Christi ac redemptoris aliena fiat atque in extremo examine districte ultioni subiaceat. Cunctis autem eidem ecclesie iura seruantibus sit pax domini redemptoris nostri Jesu Christi, quatinus et hic fructum bone actionis percipiant et apud districtum iudicem premia eterne pacis inueniant. Amen. Amen. Amen. Ego Alexander catholice ecclesie episcopus SS. Ego Johannes presbyter Cardinalis sanctorum Johannis et Pauli tt. Pamachii SS. Ego Johannes presbyter Cardinalis T. T. sancte Anastasie SS. Ego Johannes presbyter Cardinalis T. T. sancti Marci SS. Ego theodericus presbyter Cardinalis sancti vitalis T. T. vestine SS. Ego Petrus presbyter Cardinalis T. T. sancte Susane S. S. Ego hug presbyter Cardinalis T. T. sancti Clementis S. S.||
Ego Cinthy presbyter Cardinalis T. T. sancte cecilie S. S. Ego arduinus presbyter cardinalis T. T. sancte crucis in ierusalem S. S. Ego matheus presbyter cardinalis T. T. sancti Marcelli S. S. Ego Witts (sic) remensis archiepiscopus T. T. sancte Sabine cardinalis SS. Ego Hvobaldus hostiensis episcopus SS. Ego Conradus salzpurgensis ecclesie humilis minister et sabinensis episcopus SS. Ego Jacobus diaconus cardinalis sancte marie in cosmidyn SS. Ego ardicio diaconus cardinalis sancti theodori SS. Ego laborans diaconus cardinalis sancte marie in porticu SS.||
Ego Rainerius diaconus cardinalis sancti Georii ad velum aureum SS. Ego Gratianus diaconus cardinalis sanctorum Cosme et Damiani SS. Ego Rainerius diaconus cardinalis sancti adriani SS. Ego Matheus sancte Marie noue diaconus cardinalis SS. Datum Laterani per manum Alberti sancte Romane ecclesie presbyteri Cardinalis et cancellarii IIII. Idus aprilis Indictione XII. Incarnationis dominice anno M.C. LXXVIIII. Pontificatus uero domini Alexandri pape III. anno XX.

Source Fulltext: OÖUB 2 (Wien 1856), S. 362-364