In nomine sancte et individue Trinitatis Poppo Bei gracia Patauiensis Ecclesie electus universis tam futuri quam presentis temporis filiis salutem perpetuam in eo, qui est salus omnium et protectio. Omnibus notum fieri volumus, quod ex quo ea (contentio?), que inter Canonicos de sancto Nicolao et inter Ortolfum et Sybotonem et Ottonem de Tegernbach versatur, in rem iudicatam transivit, in presencia videlicet antecessoris nostri Domini Wolfkeri Pataviensis Ecclesie Episcopi suo decisa iudicio definitiva sentencia Domini Eberhardi sancte Salzburgensis Ecclesie Archiepiscopi est reservata potestati, cuius sine peticionis nostre interventu obtinuerint dilacionem, postea vero cum nos ad regimen iam dicte Pataviensis Ecclesie ordinacione divina fuissemus assumptus, prefati Canonici, quatenus latam sentenciam executioni mandaremus, humiliter postulabant. Nos itaque ne in facto huiuscemodi nimium videremur esse precipites, preter alias, quas in amicicia predictorum Canonicorum potestatis nostre auctoritate dedimus inducias, XIV. dierum peremtorias eis constituimus. Die igitur prefixo Siboto unus prenominatorum fratrum ad nostram veniens presenciam parte adversa iusticiam sibi exhiberi postulante cum exceptione cepit dicere et fiducialiter promittere, partem decime, que se contingeret, velle dimittere, predium vero in Tegernbach sue solius cessisse porcioni nimiumque in hoc sibi deperire, si solus illud perdere debuisset, nam in particione patrimonii hereditario iure hoc se asserebat accepisse. Rogabat ergo breves inducias sibi concedi, ut de recompensacione sepedicti predii cum reliquis fratribus suis determinaret. Quas cum obtinere non posset, habito consilio tam viva voce quam ex tenore scripti, quod supramemoratus antecessor noster ad confirmacionem facti predictis Canonicis tradidit, de cause decisione verius est instructus et ne huiusmodi quereret tergiversaciones, de re iudicata non esse amplius litigandum. Tandem saniore usus consilio nullo sibi patrocinante dolo tam predio sepedicto quam decime renunciavit coram testibus subnotatis, videlicet Heinrico Pataviensis Ecclesie Decano, Ortolfo Preposito de Artacker, Chunrado Archidiacono et Plebano sancti Pauli, Godfrido Canonico maioris Ecclesie, Henrico Cellerario, Eberhardo Plebano de Pfarrchirchen, Ulrico Capellano Curie nostre, Friderico Scolastico de sancto Nicolao, Heinrico fratre Wernhardi de Hagenawe, Richero de Wesen, Ottone de Aichenbach, Manegoldo de Achaim, Luitoldo de Sauerstede, Wernhero de Altenhoffen, Tiemone de Puechenperch, Alberone de Germundesperch, Ulrico filio Alkeri, Reinhardo de Neunburg. de familia sancti Nicolai Dietmarus et Henricus frater suus, Albertus, Siboto et alii quam plures interfuerunt. Ceterum nos ad instanciam peticionis predictorum Canonicorum rigorem iuris in eum, qui adhuc in sua perdurabat contumacia, Ortolfum videlicet exercentes latam sentenciam, donec ab iniuria eorum resipisceret, auctoritate supra memorati Domini Archiepiscopi et nostra executioni mandavimus presertim cum iam predictus Ortolfus audita sentencie huius executione, tamquam aliquid in sui excusacionem allegaturus adveniens partibus coram nobis constitutis audienciam habere non potuit, nisi prius absolucionis beneficium percepisset. Quod cum humiliter a nobis postulasset, sicut dictavit sentencia, eum absolvi precepimus prestita prius caucione, ut de illatis iniuriis predictis Canonicis satisfaceret, siquidem cum iam dictus Ortolfus nullo usto titulo possessionis se tueri potuisset, tam predium quam decimam, in quibus predictis Canonicis iniuriatus fuerat, abdicavit. Huius rei testes sunt Heinricus Pataviensis Ecclesie Decanus, Henricus Archidyaconus, Chalhohus Archidyaconus, Godfridus Canonicus, Henricus Cellerarius, Dietmarus Prepositus de Suben, Alramus de Utendorff, Arnoldus de Wartenburg, Walchunus de Herdegen, Wilhalmus de Gilzbache, Conradus de Walgxinge et alii, quorum nomina supra continentur. Acta sunt hec anno incarnationis Domini MCCIV. Episcopatus nostri anno primo.

Source Fulltext: OÖUB 2 (Wien 1856), S. 497-498