Wir Fridreich von gotes gnad Herczog ze O^esterreich vnd ze Steyr vnd herr ze Krain Kunden ma^enklichem in kunftige zeit, Daz vnser lieber getrewr Gundaker von Starchemberg zu vns kom vnd legt vns fur, Daz, wie wol das wa^er, daz er hiett an vestem recht, Daz alle sein Narung an allen vnsern zolsteten freylich furgiengen, Doch von Wandlung der Amptla^eut so wa^er es vnderweilent an den egenanten Steten mit ettleichen derselben Nachko^emen vmb dis ding zweyuellich vnd darumb an bewa^erung derselben sach wurd er ettwenn beswa^eret von schaden der sawmung vnd auch des Kosten Vnd pat vns, daz wier Im daruber erbieten geruchten ein scheinba^er Sicherheit vnsers gewaltes. Der pet haben wier gehullen Vnd sein darczu genayget baide von wegen seins rechten, das er vncz her gehebt hat, vnd auch vmb die gunst vnserr gnad zu Im Vnd beczeugen, daz der yeczgenant Gundaker an allen den vorgenanten Steten das obgenant recht hat, als das an disem brief gesagt ist. Dauon wellen wier vnd gebieten, daz alle Narung des egenanten Gundaker, wein, traid vnd ander notdurfftige ding seins Hauses, wie die genant sind. baide auf land vnd auf wasser, man fure Si auf, ab oder v^eber, an allen zolsteten vnserr Herrschafft, die man zu ta^eutscher sprach nennet vruart, ga^enczlich an all vorderung freylich furgeen. Wier weren auch vesticleich in den vorgenanten, Daz nyeman dhain gu^ot oder la^eut oder dhain ander ding in den egenanten Steten, die dem offt genanten Gundaker zugeho^erent, von wegen Pfandes, hazzes oder dhainer anderr sach in kain weg bekumber. Vnd durch daz dise ding alle dem offtgenanten Gundakern vnd seinen Nachko^emenden erben, als vorgeschriben ist, sta^et und vest beleiben, Erpieten wier Im zu^e ierr Krafft diesn brief geuestenet mit warnung vnserr Insigeln Vnd der Nachgeschriben geczeug. Vnd sind dis die zeug: Anshalm von Justing, Heinrich Schenkch von Habechspach, Heinrich vnd Wernhart Bru^eder genant Prw^ezel, Chol von Vronhofen, Meinhart genant Tro^estel, Ott von Walchmiskirchen, Lutwig von Netinsdorff, Wolfher genant Schine, Weighart von Spicz vnd ettleich ander. Dis ist beschechen in der Newnstat Nach Kristes gepurd Tausent zway Hundert vnd ains vnd vierczig Jaren in der sechsten Kalend des anderen Herbst Mano^ets.

Source Fulltext: OÖUB 3 (Wien 1862), S. 105-106, Nr. 101