Berhtoldus dei gratia Babenbergensis Episcopus Vniuersis presentes litteras inspecturis Salutem et sinceram in domino Karitatem. Cum ea, que geruntur in tempore, nisi litterali memorie conmendentur, obliuionis notam cum tempore consequantur, vniuersaliter singulis et singulariter uniuersis cupimus esse notum presentium per tenorem, quod dilectus nobis honorabilis uir Wernhardus Abbas Monasterii Sancti Mathei in Aspach a nostris predecessoribus fundati Patauiensis diocesis in nostra presentia constitutus coram nobis proposuit. Quod ius sagene super lacu Aterse iuxta predium in Revth ex predecessorum nostrorum collatione ad dictum Monasterium pertinere deberet ac id ipsum, ut iuris erat, ostendit legitime coram nobis, licet aliquamdiu prefatum Monasterium eiusdem sagene possessione caruisset et usu, prefatus abbas, ut sibi et suo conuentui super hoc paterna sollicitudine prouidere curaremus, nobis humiliter supplicauit. Nos igitur, qui ex iniuncto a deo nobis officio piis locis consulere et prouidere tenemur, ea, per que diuinus cultus melius et plenius poterit exerceri, non diminuere, Sed potius augmentare cupientes, considerantes nichilominus, quod prenominatus abbas nobis et ecclesie nostre multa grata et fidelia seruicia hucusque exhibuit et deinceps poterit exhibere, Ipsi eiusque successoribus nec non conuentui dicti Monasterii in Aspach et ipsi Monasterio prefatam sagenam restituimus pleno concessionis robore confirmantes ad habendum, tenendum et possidendum cum omni iure et actione, usu seu requisitione, quesitis et inquirendis, accessibus et egressibus, Quam rem siue sagenam dictum Monasterium ex nunc constituimus de iure absolute et libere possidere, promittentes ei pro nobis et pro Ecclesia nostra in dicto iure sagene sev possessione iuris eiusdem uel etiam occasione ipsius litem uel controuersiam non inferre ullo tempore nec inferenti consentire, sed ipsam sepedicto Monasterio ab omni persona legitime defendere et omnia ac singula supra scripta perpetuo firma et rata habere et tenere et non contra facere uel per alios uel per nos ipsos aliqua causa sev ingenio de iure uel de facto. Ad hoc autem faciendum plurimum nos induxit, quod ipse abbas ex parte sui conuentus nobis firmiter promisit seque ad hoc astrinxit, quod nobis uiuentibus pro salute nostra in predicto Monasterio qualibet septimana una missa pro uiuis, post mortem uero nostram una pro defunctis similiter qualibet septimana pro anime nostre remedio celebrari debeat siue dici. In cuius Rei testimonium presentes litteras super hoc editas et conscriptas et nostro sigillo sibi dedimus Roboratas. Huius autem rei testes sunt dominus Emicho decanus Babenbergensis et dominus Johannes Scolasticus ibidem, Chunradus capellanus, plebanus de Bretvelt, Chunradus plebanus de Ering, Rupertus Miles de Hertenstein, Volnandus de Wisentowe, Chunradus Chrumbelin, Alramus et Chunradus de Aterse Milites, Fridericus de Alkerstorf, Fridericus saxo officiarius in aterse, Vlricus preco in Ering, Heinricus de Pu^och, Sighardus de Steinbach et quam plures alii fide digni. Datum apud Aterse anno domini M. CC. LXXVI. In octaua beati Mihahelis Archangeli.

Source Fulltext: OÖUB 3 (Wien 1862), S. 442-443, Nr. 481