Albertus Dej Gracia Dux Austrie et Stirie, Dominus Carniole, Marchie ac Portusnaonis vniuersis, ad quos presens scriptum pernerit, Imperpetuum. Principum gloria tunc vere laudis titulis sublimatur et eminenciori decore prefulget, cum subditorum suorum obsequia clementer attendit et eis de sua liberalitate confirmat, que ab antecessoribus ipsius iuste sibi videntur indulta, cum non minus in obseruandis beneficiis quam in elargiendis principalis magnificencie crescat honor et fidelium numerus augeatur. Qua nimirum consideracione moniti pradentes viri Ciues in Styra fideles nostri dilecti cum quasdam libertates et conswetudines de permissione Illustrium quondam principum Austrie et Stirie predecessorum nostrorum vsque in presenciam perduxerint confirmacionis patrocinio sev litterarum testimonio non munitas, benignitati nostre propensius supplicarunt, quatenus libertates easdem et gracias iustificare, sibi concedere et confirmare de speciali nostra clemencia dignaremur. Que quidem iura decreuimus presencium serie declaranda. Primo quod nullus Judex prouincialis infra terminos Hofmarchie in casu quocumque vel causa judicium sibi vendicet sev iudicare presumat causis sangwinis, que mortem continent, tumtaxat exceptis, que si emerserint, ad easdem iudicandas per judicem Ciuitatis ipsius, qui pro tempore fuerit, preco prouincialis, qui vulgo waltpot dicitur, est vocandus. Item quod nullus eisdem Ciuibus preficiatur injudicem nisi talis, quem de suo consorcio iuxta beneplacitum nostrum sev principis terre duxerint assumendum. Item vt si aliquem Ciuium ipsorum casu sinistro contingat homicidium perpetrare, eiusdem homicide, si soluendo fuerit, non frangatur hospicium nec res asportentur ipsius per judicem nec vllatenus distrahantur, quia pro pena conmissi per ipsum homicidij nobis aut principi terre soluere tenebitur tantum libras denariorum triginta et judicj suo denarios sexaginta. Item vt nulli extraneo sev aduene liceat in Ciuitate et Hofmarchia predictis vinum particulariter sine dictorum consensu et licencia Ciuium propinare. Item quicumque ferrum vel ligna duxerit ad Ciuitatem vendenda, per triduum ibidem remaneat ligna sua vel ferrum, quod attulit, Ciuibus memoratis foro et estimacione conmunj contradiccione postposita venditurus; quodsi Ciues iidem infra dictum tempus merces ipsas emere non curarint, liceat venditori cum rebus suis impedimento remoto, quo voluerit, declinare. Item in Chlausa de rebus suis, quas ibidem traduxerint, nullum soluant theloneum siue Mutam. In Rotenmanne vero, in Chaetzling et apud Dietmarsperig de Sauma soluere pro Muta duos denarios teneantur. In Ascha de Sauma sex denarios et Ratispone de eo, quod comparauerit vel vendiderit Ciuis Styrensis, duos denarios pro theloneo tantum soluat. Item apud Ciuitatem Anasensem post festum beatj Johannis baptiste vsque ad festum purificacionis sancte Marie virginis de Modio Annone dent vnum obulum, sed extra tempus huiusmodj ducens annonam de Austria de Modio soluat quatuor denarios, is autem, qui in Anaso comparauerit, duos denarios et obulum inde soluet, per dictum etiam tempus videlicet a festo johannis baptiste vsque ad purificacionem predictam de fundo vasis ad Mutam duo cedant denarij, postmodum de vrna qualibet denarius detur vnus. Item in Ibsa de Cimba, quicquid contineat, soluantur quatuordecim denarij. Item in Stain de Modio, qui ibidem nauigio inpositus fuerit, vnus cedat denarius, Item in Medlico de Curru, siue sit vnius Ciuis stirensis rebus oneratus aut plurium, pro Muta sedecim denarij persoluantur, apud sanctum ypolitum quatuor denarii, in Tulna duodecim et in wienna Ciuitate duo denarij de Curru tantummodo sint soluendi. Item prefati Ciues ab omni theloneo per fora quelibet et quecumque infra duas Rastas a Ciuitate Styrensi posita sint exempti. Ad hec quicumque lucri libertatum et iurium Ciuitatis eiusdem participes fuerint, tamquam Ciues ad portandum cum ipsis seruiciorum et necessitatum suarum onera obseruancius sint astricti. Item ligna igni cottidiano et suis edificiis opportuna ducant libere sine theloneo siue Muta. Ampliori nostra dispensante beneficencia libertatis gracia fruituri scilicet quod de ferro suo, quod ipsi ad Ciuitatem suam aduxerint (sic) Mutam non soluant aliquam, tenebuntur autem hij, qui ferrum idem inde emptum abduxerint, siue sint extranei siue Ciues, Mutam dare debitam et conswetam. Volentes insuper conseruacionj pontis ibidem in antea salubriter prouidere, Mandamus, Macella siue mensas Carnium sedecim in Ciuitate de nouo fundari, vbicumque Ciuibus visum fuerit expedire, de quibus ad reformacionem pontis eiusdem due libre denariorum annis singulis persoluantur Cauto, quodsi Macella eadem in foro locari contingat propter loci mundiciam confouendam nulla in ipsis Macellis aut foro mactentur pecora para, mediocria siue magna; Quod quicumque Carnificum non seruare presumpserit, ad pontem sexaginta denarios et totidem pro pena soluet judicj Ciuitatis, quociens sic excesserit, similiter tociens puniendus. Deinde statuimus et presenti sancimus edicto, vt nullus in ipsa Ciuitate propriam Metretam teneat, cum Magister pontis Metretarum omnium esse debeat vnicus conseruator, qui indigentibus ipsas concedat de Modio mensurato vnum denarium, de dimidio vero obulum ad pontis edificium recepturus de manibus venditoris. Porro si quisquam inuentus fuerit contra hanc inhibicionem nostram vti metretis aliis sev mensuris, idem transgressor temerarius dimidie libre denariorum penam incurrat, de qua sexaginta denarij cedant ponti, residui judici Ciuitatis. Ciuibus autem ad mensurandam annonam victui suo necessariam sine precij vel mercedis respectu gratis et libere requisita metreta eadem concedatur.||
Denique presentibus duximus adiungendum, vt ad instar aliarum Ciuitatum nostri dominij Ciues ipsi huiusmodj libertate fruantur, quod per aliquem vel aliquos ipsi vel bona eorum vsquam arrestari aut conueniri non debeant, nisi prius requisita de ipsis coram suo judice iusticia fuerit et negata. Nichilominus vero nos, qui grata fidelium nostrorum obsequia tanto graciosius premiare tenemur, quanto per eorum inuiolabilis fidej et sedule deuocionis constanciam dignitatis laudabilis videmur suscipere incrementa, ad predictorum Ciuium nostrorum conmoda et profectus affectum specialem habentes, vtpote quorum in nostris conspectibus fidej puritas placuit et placebit, jura, libertates et gracias prenotatas de verbo ad verbum ipsis concedimus et liberaliter indulgemus, quasi ex nouo tribuimus et perenniter confirmamus. Nulli ergo hominum omnino liceat, hanc nostre concessionis, donacionis, innouacionis atque confirmacionis infringere paginam sev quomodolibet violare. Quod qui secus attemptare presumpserit, indignacionem nostram se nouerit grauiter incurrisse. Datum Styre Anno domini Millesimo ducentesimo Octogesimo Septimo, x. kalendas Septembris.

Source Fulltext: OÖUB 4 (Wien 1867), S. 66-69, Nr. 74