Ich Hainrich von Schowenberch tv^en allen den chvnt, di disen brief vernement, daz Salman von Lvdweigsdorf vnd ander sin frivnd, di erben wolten sin des hofes datz Melme, den selben hof so lang angesprochen habent for minen Rihtern, daz div chlag gewuchs fv^er mich, do chom Probst Rv^eger von dem Slag fu^er vnd verantwurtet den selben hof vnd behabt in for mir mit erwerigen gezivgen als verr mit dem rehte, daz im Rwe ertailet wart von dem forgenanten Salmann vnd andern erben, di dar nah sprachen oder noh sprechent wurden. Daz avch daz chloster datz dem Slag furbaz gerwet beleib for aller ansprache ovf dem forgenanten hof datz Melme, dar vber gib ich ze vrchvnd disen brief versigelten mit minem Insigel. Des sint gezivg her Hoertnid vnd her Rvdolf von Liehtenwinkchel, her Rud(olf) Schifer, her Hoertwik ab dem Strahen, her vlrich von Lvdweigsdorf, her fridrich der Pfarrer von Ort, wern(art) von Poksrvkk, Eber(hart) von winnberg, wern(art) von Rotenvels, wernher Cheltz vnd ander biderb levte. Der brief ist geben, do von Christes geburt waren Tovsent jar, Zwai hvndert iar, in dem Nivn vnd ahtzigistem jar an sancti Bartholomei tag.

Source Fulltext: OÖUB 4 (Wien 1867), S. 111, Nr. 115