Wir Friderich purchraue ze Nurnberch tuen allen den chvnt, die disen briffe an sechent oder horent lesen, die nv sint oder chvnftige werdent, daz daz mit vnserm gueten willen ist, swaz her vlrich von chappelle Levtolden von Stadeke vnd siner hauzvrawen vnd hern albers chinden von sande Petronella leicht auf daz dorfe ze stetelndorfe, daz von vns lechen ist; wer aber, daz her vlrich von chappelle von in allen daz selbe dorf chauft oder von ir ainem, swaz er sin chauft gar oder halbes, daz sulle wir ze rechtem lechen leichen hern vlrichen vnd sinen chinden, iz sein svn oder tochter. Des gebe wir im ze vrchvnde vnd zevch disen brief bestet mit vnserm insigel vnd mit den zevgen, die hie benant sint: Abt Hainrich von admu^ende, Otacher von lengepache, Gebhart von veliben, her Ditmar von strechwize, der chvnrat der phapphe, vlrich von Gru^enpurch, herman von weizsenpach, pilgrim von wartperch, freitel von winthage, vnd ander biderbe leut. Daz ist geschechen nach Christes puerde Tausent zwayhundert vnd nevnzich iare.

Source Fulltext: OÖUB 4 (Wien 1867), S. 142, Nr. 150