Ich Otte von arnstain pharraer von dem Gerungs tu^en chunt allen den, di disen brief an sehent, daz ich hern Chunrat von chappel han gegeben vreilichen daz gut, daz vro Tu^et von Risenstain hern Dytrichez hausfrowe von Ebelsperch von minen vater vnd von mir hat gehabt in haedershofer pharre, vnd pin dez selben gutez sin gewer fur min muter vnd fur min swester vnd an aller der stat vnd er sin bedarf; vnd daz im daz staet vnd vnuerchert beleibe, dar vmb gib ich im disen brief versigelt mit minen insygel. dirre sachhe sint gezevch her vlreich von Chappell hern pilgreims sun, her hainreich von volchenstorf, der Chunrat von volchenstorf, hainreich von Nivnhofen, her hauch von Reichenstain, her Ruger von hutte vnd ander piderbe livte. Dirre brief ist gegeben, do von christes geburt waz Tausent jar zwaihundert jar, in dem fivnf vnd nivnzigisten jar dez nahsten tag nach sant Mertins tag.

Source Fulltext: OÖUB 4 (Wien 1867), S. 231, Nr. 255