Ich Chvnrad von Scherenstayn vnd ich Chvnrad sein svn vnd ich Gvndakcher sein svn tuen chvnt All den, die disen prief lesent oder horent lesen, di nu lebent oder her noch chvmftig werdent, Daz wir mit vnser Erben guetem wille vnd gvnst vnd ze den zeiten, do wi\er iz wol getuen machten, verchow°ft haben vnsers rechten Aygens ein Mul, di do leit vnder Dachsperich an dem Gaylspach, di do dient wol svben schilling phenning, vmb sechczehen phvnt phenning, wienner Mvnzze, der wir redleich vnd recht gewert sein, Den Erbern Herren Hern Ebr, vnd hern Wolfkern von Dachsperich vnd allen ieren Erben furbaz freileich ze haben vnd all iem frvm damit schaffen, verchowfen vnd ze versetczen vnd geben, swem se wellen, an allen iersal. vnd der vber durich pezzer sicherhait so secz ich mich Chvnrad von scherenstayn vnd Chvnrad mein svn vnd Gvndakcher mein svn ze rechtem scherm fu^er alle ansprach, als aygens recht ist vnd des lands recht ze Osterrich, ob in furbaz mit recht an dem vorgenanten gut iecht abgieng, Daz schullen se haben ouf vns vnd ouf alle dem vnd wier haben in dem land ze Osterrich. Vnd geben in dor vber vnsern prief versigelt mit vnsern Insigel vnd mit hern Eberharts Insigel von Walse, ze den Zeiten Houptman ob der Ens, vnd mit hern Andres Insigel von Svnnberch, di diser sach zeug sint mit ier Insigel, vnd ander pider lewt genueg, den dise sach wol chvnt ist.

Source Fulltext: OÖUB 4 (Wien 1867), S. 368-369, Nr. 397