ICH Ortolf von Chornberch vergihe vnd tun Allen den chunt, die disen brief sehent oder ho^erent lesen, daz ich mit miner hausfrawen vrovn Diemuten vnd mit vnser beder gerben gutem willen vnd mit ir hant verchauffet han minem herren her Vlrichen von Waltse vnd sinen gerben min haus Chornberch vnd minen hof ze Chrotendorf vnd minen hof vnter dem hause ze Chornberch mit alliv div, vnd zv dem vorgenanten hause vnd zv den êgenanten hoven geho^eret ze velde vnd ze holtze vnd ze wazzer, gestiftet vnd vngestiftet, versu°chet vnd vnversu°chet, swie ez genant ist, vm fv^enf vnd Sehtzech March silbers gewegens wiennisches gewihtes Vnd han dar vber minem herren hern Vlriche von Waltse vnd sinen gerben gelobet daz vorgenante haus vnd die hove mit alliv div, vnd darzv° geho^eret ze schermen nach rehtem landesscherme vor aller ansprache. Vnd swaz er dar vber schaden naeme an dem scherme, den schol ich vnd mine erben im vnd sinen erben ablegen, daz schvlen si haben auf vns vnd auf ellev div, vnd wir haben. Vnd daz der gewerf vnd div gelv^ebde chraft haben vnd vnzebrochen beliben, dar vmbe han ich im disen brief geben mit minem insigele ze einem vrchvnde der warhait. Des sint geziuge Her friderich von Wolvesowe, Her Chunrat ab dem Graben, Her Herman von Sturmberch, Her Otte von Ratensdorf, Her Chunrat von dem Tvrne, Her friderich von Haldenraine, Her Chunrat von Lu^etenberch, Vetze ab dem Graben, Vlrich ab dem Laze, Vlrich von Praitenvelle, Vlrich von Chrenowe vnd andere biderbe liute. Ditze ist geschehen vnd ist der brief geben ze Graetz von Christes geburt Tausent iar Driv Hundert iar vnd in dem andern iare, da nach An der hailigen Chindelin tage in den Wihnahten.

Source Fulltext: OÖUB 4 (Wien 1867), S. 422-423, Nr. 456