Ich Gundacher van Storchenwerch vergich vnd tu°n chunt Allen den die nv sind vnd hernach chu^emffetich werdent, die disen Prief sehent Oder ho^erent Lesen, Daz Aleram der Wiltperger vnd sin Hausurowe vro^ew Geisel fuer vns cho^emen sint mit veraindem mu^et vnd mit gutem willen aller der Erben, dew sew habent, habent sew den ho^efe dacz Pelnberge vnd die hueb varm holcze versaczte ze rehter saczunge ze Sechese .Jarn mit miner hant, als ez rehte lehen ist van mir, mit alle dew vnd darzv^e geho^eret, versuecht vnd vnbesuecht, mit aller gulde, swie daz genant ist, vnd Daz selbe gu°t ist gelegen dacz Sand Galen Newenchirchen in der Pfarre vnd hat Hainrich Chienast vnd sin Pru^eder Eberhart vnd ier paider Erben auf daz selbe gu^et geliehen ze rehtem sacze, ze Sechs Jarn zwaimivierczich pfunt pfenning wienner Mu^ensse vnd ist auch in der frist der saczunge alle Jar lo^esunge an sand Go^ergentag vnd schol auch der sacze nv^er gelo^est werden van Alerams aygenhafeden gu^et, sin vnd siner erben vnd mit dehain andern gu^et vnd ist daz getan, daz dew sechs Jar auz cho^ement, daz in den Jarn niht der sacze gelo^est wirt, so hat sich daz gu°t verfallen also mit ausgenomered, Daz vier schiedman vm dew v^ebertewêrunge sint genomen v^eber daz gu^et van in paidenthalben, swas daz guet tewêrre sei danne die vorgenanden pfenning, daz schol Hainrich Chienast vnd sin Pru^eder gelden vnd ir Erben nach ir vierer rat, vnd swas da verschaiden wirt van in, Daz schol auch aleram vnd sin Erben stet haben an allen fu^erzuge vnd sint auch die schiedelewt hie benant, her Hainrich van Sweinpach, Ott der Chamrer, Walchuen der Celler, Ott der Celler, vnd ob ir ainer stu^erbe in der zeit, So schol man ain andern immer nemen an des selben stat, der in baidenthalben darzv^e gefalle, vnd schol auch ich vnd min Erben Das vorgenanden gu^etze herre vnd gewer sin ze rehtem satze fu^er dew vorverschriben pfenning zstem reht, als vore geo^efent ist, mit min trewen nach lantze reht Hainrichs Chienastes vnd sins Pru^eder Eberhartze vnd ir paider erben, Daz dew red stet vnd vnuerchert beleibe van mir vnd van min Erben, dar v^eber gib ich Gundacher van Sto^erchenwerch disen Prief zv aim o^effen vrchunde versigelden mit mim anhangunden Insigel, Des ist gezeuge Her Hainrich van Sweinpach, Allbreht der Stadler, Ott der Chamrer, Walchuen der Celler, Ott der Celler, Seibot der Sweinpeche, Hainrich der Sweinpeche, Durinch van Aigelsperge vnd ander piderber lewt genuege. Der Prief ist geben dacz Wiltperge, Do van vnsers Herren Christus gepurde ergangen warn Tausent Jar, Drew hundert Jar, Darnach in dem fu^emffe vnd zwaingisten Jar an sand Go^ergentag.

Source Fulltext: OÖUB 5 (Wien 1868), S. 422-423, Nr. 424