JCH Vlrich der Weidenholtzer, mein Hawsfraw vnd all vnser Erben veriechen vnd tu^en kund offenlichen mit dem brief allen den, die in sechent, Ho^erent oder lessent, das wir mit wolbedachtem mutt vnd nach Ratt aller vnser pessten frewndt, willen vnd wortt vnd zw ||
der zeitt, da wir es wol getun machten, Den Edlen wolgeboren vnsern gnadigen Herren Graf Hainreichen, Graf Wernhartten, Graf wilhalbmen, graf ruedolffen vnd graf fridreichen gebruedern grauen zw Schawnnberg vnd allen iren Erben vnd nachkomen mit der vest Weidenholtz gewartig vnd warttund sein, wie es in aller fueglichistenn zw allen Iren nottdurfften vnd yemant andern, Es sey dann mit irm gutlichem willen vnd wortt. Wir schullen auch dj vest in haben vnd warttund sein, damit das kain gefar icht da sey vnsern vorgenanten gnadigen Herrn, Es sey dann mit irn gutlichem willen vnd wortt, das in vnd iren Eriben vnd nachkomen von kain Herrn, wie der genant ist, geistlichen oder weltlichen Herrn ichtt Krieg dauon auferstund. Tatten wir des nichtt, was sy des schaden namen oder wie der schad genant mag sein, den vnser vorgenanten herrn oder ir Erben vnd nachkomen an ayd vnd vngesworn mit iren worten darumb zu gelauben gesprechen mu^egen, dieselben schaden alle schullen sy haben vnuerschaidenlich datz vnns, vnsern Eriben vnd vnsern trewn vnd darzw auf aller vnser hab, wo wir dj haben, lassen, gewingen, versucht vnd vnuersuchtt, da schullen sy sich derselben vnser hab vnd gutt vnderwinden mit vnserm vnd irenn gutlichem willen vnd wortt vnd dahin kain widersprechen nicht mer haben an als geua^er, vnd was wir mit vnserm vorgenanten gnadigen Herrn kriegen oder rechten woldenn, das wa^er mit geistlichem oder weltlichem rechten, oder wie es genant mag sein, das habent sy alles an aller Statt behabt vnd gewunen vnd wir voraws gantzlichen verlorenn vnd schullen auch des vnser vorgenant lieb Herrn vnd jr eriben vnd nachkomen gein kain Herrn, wie die genant oder gehaissen mu^egen sein, geistlich oder weltlich Herren ir gnad vnd huld in kainer weis darumb nicht verliessen, vnd des zw ainem warenn Vrkund geben wir vnsern vorgenanten gna^edigen Herren vnd iren Erben vnd nachkomen den brief Besigelt mit meinem anhangunden Jnsigl vnd zw ainer pessern sicherhaitt vnd Zewgnu^es der sach mit der Erbern liebn Herrn Gothartten flachnekher, Herrn Jacobs des strachner, Herrn dietreichs des geltinger, Herrn Bernhartten des aistershaimer vnd Herrn Konrades des Mosa^er aller anhangunden Jnsigeln, die, wir vleissigklich darum gepetten haben, das sy der sachen zewg sind mit jrenn jnsigeln in vnd iren Erben an schaden; Darunder wir vnns verpundten mit vnsernn trewn alles das war vnd statt zw halten vnd zw volfu^eren, das oben geschribnn stett Trewlich an alles geua^er. ||
Der brief ist geben, do man zallt von Kristi gepu^erd Tawsent drew hundertt Jar vnd in dem ains vnd dreissigistenn Jar an sannd Gregorigen tag in der vasstenn.

Source Fulltext: OÖUB 6 (Wien 1972), S. 3ff., Nr. 4