ICH Alber von Rauhenstain vnd ich Hainreich von Schroetenberge vnd ich Herman Hertinch vnd ich Eberhart von Wultzendorf wir veriehen vnd tu^en chunt allen den, die disen brief lesent oder horent lesen, Daz wir vnuerschaidenleichen gelten suln den erbern Herren hern Hainreichen, hern fridreichen vnd hern Reinprechten den bru^edern von Walsse vnd irn erben Hundert march Silbers ie vier vnd sechtzich grozze pehemische phenninge fur ein iegleichev march, Dez wir si wern suln an alle wider rede swenne daz ist, daz si iz an vns vordernt. Tun wir dez nicht, so suln wir alle vier dar nach vber vier wochen dez naehsten tages darnach iederman selb ander mit zwain Phaerten ze wienne in ein erber Gasthaus varen, da vns die erbern herren her Hainreich vnd her fridreich vnd her Reinprecht die bru^eder von walsse vnd ir erben hin zaigent vnd suln wir da inne ligen vnd laisten, alz inne ligens vnd laistens recht ist vnd suln da nimmer auz chomen, si werden dez vorgenanten Silbers gar vnd gaentzleich verricht vnd gewert, daz loben wir alle vier vnuerschaidenleich an allez gevaer ze laisten mit vnsern Trewen an aides Stat vnd geben in dar vber disen brief zv einem vrchunde vnd zv einem gezeuge versigilt mit vnsern Insigiln. Diser brief ist geben ze wienne nach Christes gebu^ert Dreuzehen Hundert Jar, darnach in dem ainen vnd Dreizgisten iar, dez naehsten vreitages nach vnser vrowen tage ze der Schidunge.

Source Fulltext: OÖUB 6 (Wien 1972), S. 31, Nr. 26