Ich Gundacher von Losenstain vnd ich Perichtolt von Losenstain vnd ich Hertel von Losenstain Wier drey Pru^eder vergehen offenbar an disem Prief vnd tvn chunt allen den, di in lesent oder ho^erent lesen, di nu lebent oder noch chu^enftich werdent, Daz wir dem Erbern Ritter Herrn Friderich dem Ro^eten, Otten vnd Nyclan sein Pru^edern ze rechtem lehen gelihen haben dev lehen, di her nach geschriben stent. Daz ist daz Ansidel vnd daz Haus, dar inne ir vater gesezzen ist Halbz Und di Go^elsenhv^eb gar vnd fu^enf Guet gelegen an dem Raday vnd den zehent gar, der gelegen ist in wyenner Pfarr (sic) vnder dem Haus ze Lenstain vnd zwai an dem Chalich vnd zwai in der Pernzell Pei dem Weg an dem Perg ainz, an der Svnleiten ainz vnd fv^enfen dacz Sulczpach jn Neunchircher Pfarr pei Gruenburch Sibenthalbz. Wier tv^en auch in di gnad besunder, ob vnder in ainer oder mer sturben, daz di vorgenant Lehenschaft des andern sein vnd seiner erben rechtz Lehen sein sol, als oben geschriben stet. Wier vergehen auch, auf welhen vnder in di selb Lehenschaft geviell, der sol der andern Lehentrager sein an schaden vnd an allez gevaer. Wand wir auch vnder vnsern Lieben Pru^edern di eltisten sein, geben wir in zu einer staetichait vnd ewichait diser obgeschriben sache vnsern gegenbu^ertigen offen Prief versigelt mit vnser Dreyr anhangunden jnsigeln. Der Prief ist geben, du nach Christ gepu^erd ergangen waren Dreuzehen Hvndert jar, dar nach in dem Siben vnd Dreizkisten jar des naechsten Svntags vor Pfingsten.

Source Fulltext: OÖUB 6 (Wien 1972), S. 238, Nr. 235