Ich Otte von wildekke vnd ich Ofmey sein hausvrowe vnd ich alber von wildekke sein Pru^eder, Wir vergehen vnd tv^en chvnt allen den, die disen brief lesent oder ho^erent lesen, die nv lebent vnd hernach chv^enftich sint, Vmb alle die Chriege, die zwischen vns vnd vnsern vetern hern Dietreichen vnd hern Stephan den Pru^edern von Hohenberch gewesen sint, Daz wir vns dar vmbe mit einander frevntleich vnd gu^etleich verebent vnd verricht haben nach vnsers Herren vnd vetern Rat des erbern Prelats apt wu^elfing des altenburger von dem Cho^etweige vnd nach ander vnser frevnt rat Also, daz wir mit vnser erben gu^eten willen vnd gunst, mit verdachtem mu^et vnd mit gesampter hant zv^e der zeit, do wir iz wol getv^en mochten, Recht vnd redleich ze rechtem widerwaechssel gegeben haben den egenanten vnsern vetern hern Dietreichen von Hohenberch vnd seiner hausvrowen vron Elzbeten vnd hern Stephan von Hohenberch vnd seiner hausurowen vron alhaiten vnd allen irn erben, des ersten mit vnsers Lehen Herren hant des Hochgeborn fu^ersten Hertzoge Albrechtes ze O^esterreich, ze Steyr vnd ze Chêrnden in dem Newenwalde vnser waelde, die wir gehabt haben bei der waltstnikch vnd bei der saltzach vnd hinder dem Gippel vnd bei der Mu^ertz, vnd alle die vischwaide, die wir gehabt haben auf den selben wazzern vnd auf der Traysem vnd alles vnser Jaide, daz wir gehabt haben in den selben gepieten vnd dar zv^e allev vnsrev recht, die wir gehabt haben in dem Newenwalde, ez sei an dem Gerichte, an zo^ell, an Maut, auf waelden, auf Strazzen, auf wazzern, auf Maêrchten, auf ho^euen vnd in dem Sebache, auf dem Pu°hel zwen vnd sibentzich phenninge geltes. Vnd vnder dem Gippel im zekkernitz dreizzich dienst Chaes geltes vnd auf Dietreichs Hof da bei zwaintzich phenninge, vier halb Chaes, einen halben metzen Magen, ein vaschange Hu^en geltes vnd auf des Rafreiter Hof fumftzich phenninge. Siben halb Chaês, einen halben metzen Magen, ein vaschang Hu^en geltes vnd alles daz, daz wir gehabt haben innerhalb Hohenberch in vrbar an vnser verlehents gu^et, vnd allev dev Recht, die wir gehabt wolden haben von hern Rapots wittibe von wildekke vnd von der Ebergo^ezzingerinne vnd von der Ochssenburgerinne an dem anerstorben gu^et, ez sei in vrbar, daz gelegen ist in der vnrecht Traysem auf des Herberger Hof, auf des Paurn hof in dem Mitterpach vnd datz winthag vnd in dem halbpach vnd in dem Eschenpach, an dem, Scho^ennpodem, an des Chnappen wart, vnd datz den Chienstainen dreitzehen phenninge geltes, in dem Staudach vnd auf dem Pu^ehel sechtzehen phenninge geltes, in dem Chiental drei phenninge geltes. In dem voeuchtêch vier phenninge geltes, vnd haben in auch gegeben daz verlehent gu^et, daz vns von den vorgenanten vrowen anerstorben ist, da wir recht an gehabt haben, daz die Newenwalder von vns ze Lehen gehabt habent an dem Hof in dem Rotenpach vnd an dem Roeut datz winthage, in dem Mitterpach auf des Paurn Hof, an dem zehent, der gelegen ist in weinberger Pharre, vnd die zehent, die Dietreich der Chlaffenprunner vnd weigel in dem Chendilpach gehabt habent von der Ebergo^ezzingerinne, vnd haben in gegeben mit vnsers Lehen Herren hant des Hochgeborn fu^ersten Pischolfs albrechtes von Pazzawe allen den zehent, den wir in urbar im Newenwalde gehabt haben, grozzer vnd chlainer, vnd dreitzehen Garten phenninge geltes, vnd haben in gegeben vnsers rechten aigens drithalben vnd zwaintzich phenninge geltes auf des Tampels Mu^el, dev gelegen ist in dem Marchte ze wilhalmspurch also, daz si mit dem vorgenanten gu^et allem suln fu^erbaz ledichleichen vnd vreileichen allen irn frvmen schaffen, verchauffen, versetzen vnd geben, swem si wellen an allen irresal vnd sein auch wir, ich Otte von wildekke vnd ich Ofmey sein Hausfrowe vnd ich alber von wildekke vnd vnser erben vnuerschaidenleich des selben gu^etes alles vnser vetern hern Dietreichs von Hohenberch vnd seiner hausvrowen vron Elzbeten vnd hern Stephans von Hohenberch vnd seiner hausvrowen vron alhaiten vnd irr erben recht gewern vnd scherm fvr alle ansprach, als Lehens vnd aigens recht ist vnd des Landes recht ze O^esterreich; waer aber, daz si mit recht an dem selben gu^et allem icht chrieges oder ansprach gewunnen, swaz si des schaden nement, daz svln wir in alles aus richten vnd wider chern an alle ir mv^e vnd an allen irn schaden vnd suln auch si daz haben auf vns vnd auf allem vnserm gu^et, daz wir haben in dem Lande ze O^esterreich oder swo wir ez. haben, wir sein lebentich oder tode vnd habent auch si wider daz egenant gu^et alles vns zu^e rechtem widerwaêchssel geben vier gu^et, die ligent im halbpach in der awe an dem Lehen vnder der leiten am salichenekke, daz wir auch damit suln allen vnsern frumen schaffen, alz vns daz aller peste wol chum vnd fu^ege an allen irresal, vnd habent auch vns dar zv gegeben siben vnd Dreizzich phvnt beraiter wienner phenninge. Vnd daz diser widerwaechssel fu^erbaz also staet vnd vnzerbroehen beleibe, Dar vmb so geben wir in disen brief zv^e einem waren vrchv^ende diser sache, versigilt mit vnsern. jnsigiln vnd mit des vorgenanten vnsers Herren vnd vetern jnsigil apt wu^elfings von dem Cho^etweige, der diser sache gezeuge ist mit seinem jnsigil. Diser brief ist geben nach Christes gepurt drevtzehen Hvndert iar, dar nach in dem viertzgisten iar an sant Jacobs Tage des Merern.

Source Fulltext: OÖUB 6 (Wien 1972), S. 338ff., Nr. 333