Ich Perchtolt von Pergawe Vergich vnd tu^en chunt allen den, die disen prief lesent oder horent lesent, Die nu lebent vnd hernach Chunftig sint, Daz ich mit gu^eten willen vnd gunst aller meiner erben, mit verdachten mu^ete nach meiner pesten vrevnde rat zv der zeit, da ich ez wol getu^en mochte, Vnd auch mit meines Lehenherren hant, des edeln vnd des Hohgeporen fv^ersten Hertzog Albrechts in O^esterrich, in Steyr vnd in Cherenden Recht vnd redleichen verchaufet han Meinen Tayl daz halbe Haus Schranabaten vnd swaz darzu^e gehoret, als ez von alter her cho^emen ist, Daz vnser rechtes Chaufgu^et gewesen ist von heren vlreichs Chinden des alten schutzemaisters von Steyr vnd meines rechten aygens meinen tayl, den ich gehabt han an dem Dorffe Ru^etzensto^erf mit der Manschafte vnd swaz dar zue gehoret vnd gantzen Dorf zehenten da selbens chlainen vnd gro^ezzen, der lehen ist von dem apte von Mellich (!), daz ouch vnser rechtes Chaufgu^et gewesen ist, daz han ich alles verchaufet vnd geben Meinem Pruder Hern Vlreichen von Pergawe, zv den zeiten Hertzog Albrechts Hofmaister in Osterrich vnd allen seinen Erben Mit allem dem nutze vnd rechte, als ich ez in aygens vnd in Lehens gewêr herpracht han, Vmb Achthalb Hvndert phunt phenninge wienner Mvntze, der ich gar vnd gantz verricht vnd gewert pin, fu^erbaz ledichlichen vnd vreylichen ze haben vnd allen seinen frvmen da mit ze schaffen, verchauffen, versetzen vnd geben, swem Er wil, als im daz wol chom vnd fu^ege an allen jrresal. Vnd pin auch ich vorgenanter Perchtold von Pergawe des selben vorgenanten gutes allez meins Pruder heren Vlreichs von Pergawe vnd aller seiner Erben fv^erbaz rechter scherem vnd gewêr, als Lehens vnd aygens recht ist vnd des Landes recht ze Österrich. Vnd swaz jm fu^erbaz mit recht daran abe gêt, Daz sol Er haben vnuerschaidenlichen auf mir vnd auf allem meinem Gu^et, daz ich han in dem Lande ze Osterrich, ich sei Lebentig oder Tode. Vnd daz der chauf vnd dise rede fu^erbaz also stête sei, Daruber so gibe ich jm disen brief ze ainem offen v^erchu^ende vnd ze ainem waren gezeuge vnd ze ainer Ewigen vestenu^enge versigilt mit meinem jnsigil vnd mit der erbern Herren jnsigiln vnser gu^eten vrevnde heren Hadmares des Stuchsen von Trautmanstorf, hern Merten des Stuchsen seines Prvder vnd heren Hainreichs des Perner, Die diser sache gezeuge sint mit iren jnsigiln. Diser Prief ist geben ze wienne nach Christes gepv^ert Dreutzehen Hundert jar, darnach in dem ayn vnd Viertzigistem jar an sand Gyligen Tage.

Source Fulltext: OÖUB 6 (Wien 1972), S. 387f., Nr. 384