Ich Hadmar hern Hadmars sun dez Stuchssen von Trautmanstorf vnd ich Offmey sein hausurowe Wir veriehen vnd tu^en chunt allen den, die disen brief lesent oder horent lesen, die nv lebent vnd hernach chunftich sind, Daz wir mit aller vnser Erben gu^eten willen vnd gunst, mit verdachtem mut vnd mit gesampter hant zv der zeit, do wir iz wol getu^en mochten, Verchauft haben vnsers rechten aigens vnsern halben Hof ze Sybenprunne vnd vnsern Tail an dem Purchstal da selbens vnd alles daz, daz zv dem egenanten halben Hof vnd zv vnserm Tail dez vorgenanten Purchstals geho^eret, ez sei wysmat, aekcher, in vrbar, ze holtz, ze veld vnd ze Dorffe, ez sei gestift oder vngestift, versu^echt oder vnuersu^echt, swie so daz genant ist. Den vorgenanten halben Hof vnd allen vnsern tail an dem egenanten Purchstal vnd swaz dar zv gehoret, alz vor verschriben ist, haben wir Recht vnd redleichen verchauft vnd geben mit allem dem nutz vnd rechten, alz wir iz alles in aigens gewer her pracht haben vnd alz ez auch von alter her chomen ist, Vmb Acht vnd Zwaintzich phunt wienner phenninge, Der wir gar vnd gaentzleich verricht vnd gewert sein, Dem erbern manne Vlreichen von Merchenstain vnd allen seinen Erben furbaz ledichleichen vnd vreileichen ze haben vnd allen im frumen da mit ze schaffen, verchauffen, versetzen vnd geben, swem si wellen an allen irresal. Vnd dar vber durch pesser sicherhait so setzen wir ich egenanter Hadmar der junge Stuchsse vnd ich Offmey sein Hausurowe mit vnser Erben gu^eten willen vnd gunst, mit gesampter hant zv der zeit, do wir iz wol getu^en mochten, vnsers rechten aigens allen vnsern Tail, den wir haben an dem gu^et datz dem Hof, ez sei in vrbar, ze Holtz, ze veld vnd ze Dorff, gestift oder vngestift, versu^echt oder vnuersucht, swie so daz genant ist, Vlreichen von Merchenstain vnd allen seinen erben vber den vorgesprochen halben Hof ze Sybenprunne vnd vber vnsern Tail dez vorgenanten Purchstals vnd vber alles daz, daz dar zv geho^eret, Swie so daz genant ist, alz vorgeschriben stet, zv rechter Ebenteur vnd auch gewern vnd Scherm fu^er alle ansprach, als aigens recht ist vnd dez Landes recht ze O^esterreich. Waer aber, daz si mit recht an dem oftgenanten halben Hof ze Sybenprunne vnd an vnserm Tail dez egenanten Purchstals vnd an alle dev, vnd dar zv geho^eret, als vor an disem brief geschriben stet vnd an der vorgenanten Ebentevr icht Chrieges oder ansprach gewunnen von swem daz waer, oder daz in dez vorgenanten Scherms an der egenanten Ebentevr icht abgienge, daz suln wir in an allen irn Schaden alles auz richten Vnd suln auch si daz haben auf vns vnd auf allem vnserm gu^et, daz wir haben in dem Lande ze O^esterreich, wir sein lebentich oder tode. Vnd daz diser Chauff furbaz also staet vnd vntzerbrochen beleibe, dar vmb so geben wir in disen brief zv einem warn sichtigen vrchunde vnd zv einer Ewigen vestenunge versigilt mit vnserm jnsigil vnd mit dez erbern Herren jnsigil hern Otten von Walde vnd mit vnsers bru^eder jnsigil Vlreichs dez jungen Stuchssen, die diser sach gezeuge sind mit irn jnsigiln. Diser brief ist geben ze wienne nach Christes gepu^erde Drevzehen Hundert iar, dar nach in dem Drev vnd Viertzgisten iar dez Moentages in der ersten gantzen Vastwochen.

Source Fulltext: OÖUB 6 (Wien 1972), S. 439f., Nr. 434