Ich Ortweyn von Waltpurch vnd mein svn all drey Wolfganch, Purchart vnd Ortweyn wir veriehen offenbar daz wier haben geben zechauffen vnsern hoff, d er genant ist der Raennehoff vnd dy mvl gelegen dapey vnd vnser hveb ze Oczeinsdorff mit alle dem recht, vnd wir dy egenanten gut, dy da gelegen sind in Lozperger pharr, ze lehen gehabt haben von dem edeln Herczogen in Osterreich vnd auch mit allen nvczen, dem erbern mann Wulfing zden czeyten stat richter in der Vreinstat vnd seiner hausvravn Elspeten vnd ir payder erben vmb sechs vnd sybenczk phunt phenning alter wienner mvnss, der si vns gancz vnd gar gericht vnd gewert haben. Vnd schullen wier auch in dy egenanten guet mit alle dem recht, vnd wir sev gehabt haben, auf geben vnd mit herren hant richtig machen an allen chrieg vnd an all wider red, wenn si daz an vns ayschent. Daz dem offt genanten Wulfing vnd allen sein erben dy red vnd dy Wandlung staet vnd vnuerchert beleih, daruber zv vrchvnd vnd zv einem waren sichtigen zeug geben wir jn; ich vorgenanter Ortweyn von Waltpurch vnd ich Wolfganch vnd Purchart sein su^en dysen offen prief fur vns vnd fur all vnser erben wol besigelten vnd bestaet mit vnsern anhangunden insigeln fur allen chvnftigen chrieg. Dar zv verpint ich mich ich vorgenanter Ortweyn der jung vnder dy egenanten Insigel allez daz staett ze behalten, daz vorgeschriben ist, wand ich aygens insigels nicht enhab. Der prief ist geben nach Christes geburd drevzehen hvndert iar, dar nach in dem syben vnd vierczkysten jar an sand Thomans tag.

Source Fulltext: OÖUB 7 (Wien 1876), S. 39, Nr. 41