Wir Graf Heinreich von Schounberch veriehen offenbar mit disem brief, das der ersam her Otte der Tuschel zu den zeiten chorherre vnd chelner ze Pazzow hat Heinreichen Chunrats sun von Ekkreichstorf aus dem Haychenpach die hueb ze nidern Ruedlahingen, die der chorherren ze Pazzowe lediges guet ist, zu rehtem vreisätze lazzen ze styften vnd ze stören als ander ir vreysätzen, vnd schol auch der ob genant Heinreich noch dhein sein erbe auf die obgenante hueb dheines andern rechten nicht iehen. Dar vber ze vrchünde geben wir disen offen brief besigilten mit vnserm anhangunden insigel, den wir geben haben nach des ob geschriben Heinrich vnd seiner erben vnd auch nach seiner besten vreund bette, vnd dar vnder verpint sich der oft genant Heinrich vnd alle sein erben, vnd lubent mit iren trewen, alles das stät ze haben, das vor an disem brief beschriben stat, wand si aygnes insigel nicht enhabent. der brief ist gehen an samtztag vor sand vrbans tag, da man zalt von Christes gepuerde drevtzehen hundert iar vnd dar nach in dem nävn vnd vyertzkistem iar.

Source Fulltext: OÖUB 7 (Wien 1876), S. 107, Nr. 108