Ich Katrei Tu^erings des Lertz witibe, dem got genad, purgerinn ze Steir vergich vnd tu^on chunt allen den, di den brief ansehent oder ho^erent lesen, daz ich mit wol verdahtem mu^ot zu der zeit, do ich ez wol getu^on mocht vnd auch pillich tu^on scholt, mein geschaft also geschaft han, als ich wil, daz ez staet beleih, ob ich nicht sein schol. Ich schaffe meinn weingarten dacz Ringeltal in der Wachawe gelegen Friderichen dem Schu^eler meiner swester su^on, daz man in do mit in ain chloster pring. Ich schaffe meinn zehent datz Hautzenbach vnd die Ofenhu^eb meiner swester chindern. Ich schaffe mein hueb auf dem Pirchaech hintz sant Gilgen vmb ain ebigs licht, vnd liezze man daz aber gen, so sol si gevallen ebichleich ze Gersten in die oblei. Ich schaffe mein hueb datz Paumberg dem gotzhaus ze Tauershaim vmb ain ebigs licht vnd zu dem werch. Ich schaff die hueb datz Twericho^ede hintz Gleunch in die oblay vmb ainen ewigen iartach. Ich schaffe mein hueb datz den Chötern Elspeten meins wirtz swester vntz an iren tode vnd nach irem tode hintz sand Florian in das spital. Ich schaff di hofstat pei Symonn in dem gru^enenort vnd mein chravt gaertten dem spital ze Steir. Ich schaff fu^enzehen pfunt pfenning hintz Gaersten in die oblay vmb ainn ewigen iartach. Ich schaffe meiner swester Alhaiden daz Tirnstain fu^enzehen pfunt pfenning. Ich schaffe Katrein meiner swester tochter datz Tirnstain aht phunt pfenning. Ich schaffe swester Agnesen der Harnnvarstinn datz Ibbs aht phunt pfenning. Ich schaffe vierzehen phunt pfenning in daz spital ze Lintz. Ich schaffe mein bruder hern Maystolnen fu^enzehen phunt pfenning vnd dieselben pfenning sol man nemen von meim haus datz Steir. Daz daz alles also staet vnd vnzerbrochen behalten werd, gib ich obgenantev Katrei den brief versigelt mit der stat insigel ze Steir vnd ist geschehen, do man zalt von Christes gebu^ertte drevzehenhundert iar vnd darnach in dem fu^enfczichistem iar daz mantags vor dem Prehentag.

Source Fulltext: OÖUB 7 (Wien 1876), S. 163f., Nr. 164