Ich Jost von Rosenberch vergich und twn chunt offenbar an disem brief allen den, dy in sehent oder horent lesen, daz ich mich verpunden und verhaizzen han umb alle dy stozz und aufflauffe, dy zwisschen mein und dem edlen manne hern Eberharten von Waltsse vnd seinem purgrafen von Valkenstain dem Pyber geschehen sint, daz wir der paidenthalben gegangen sein hinder dy erbergen herren hern Wilhalm von Lanczstain und hern Ulreichen von Capelle und waz dy nach unser baider furgab bey ir aid und bey irn trewen daruber sprechent zwisschen hie und vierczehen tag nach sand Merteinstag der nu schirist chumt, daz schull wir beidenthalben stet haben, und schol sich auch der spruch vergen in der vorgenanten zeit, wenn dy obgenanten spruchherren wellent, an dem gemercht zwisschen der Haid und Rainpach. Mit urchund des priffes, der versigelt ist mit meinem anhangenden insigel und geben ist zder Haid, do man zalt von Cristes geburt dreuczehen hundert iar, darnach in dem funf und funfczigisten iar des phincztags nach unserr vrawen tage, als sy gebarn ward.

Source Fulltext: OÖUB 7 (Wien 1876), S. 422, Nr. 411