Ich Jans czu den czeiten richter ze Mu^enspach vnd ich Els sein hausvrau vnd all vnser erben vergehen vnd tu^en chund allen den di den prief sehent oder horent lesen, daz wier hern Chunraten dem pharrer datz sand Thoman vnd seinen nachchomen ze chauffen haben gegeben vmb siben phunt phenning der wier gentzleich gewert sein, ein hofstat, di zenachst sand Thomans chirichen gelegen ist, di vnser rechtes lehen waz von vnsern gnedigen herren von Chappeln, di auch dem vorgenanten herrn Chunraten di aygenschaft auf der selben hofstat habent gegeben im vnd allen seinen nachchomen. Wier schullen auch der selben hofstat gewer sein nach landes recht in O^esterreich. Dez sint geczeug her Seyfrid czu den czeiten pharrer ze Mu^enspach vnd Hainreich der Jnczinger vnd Heinreich der Chestel vnd ander erber leut genu^eg. Dar czu^e gib ich Jans der Richter den prief versigelt mit meinen insidel vnd mit Petreins insidel, der czu den czeiten richter waz dacz Czell. Datum anno domini M° trecentesimo L, quinto jeronimi presbiteri.

Source Fulltext: OÖUB 7 (Wien 1876), S. 423, Nr. 413