Ich Alber von Pu^echhaim obrister druchsa^etz in O^esterreich vnd mein erben vergehen vnd tu^en chunt allen den, die disen brief lesent oder ho^erent lesen, daz wir mit gu^etem willen mit verdachtem mu^et zu der zeit do wir ez wol getu^en mochten, recht vnd redleich gesatzt haben vnsers rechten aygens daz do^erf ze Nydern Ekchendo^erf vnd allez daz daz dar zu^e geho^eret, ze velde vnd ze do^erffe in vrbar gerichte ez sey gestift oder vngestift versu^echt oder vnuersu^echt swie so daz genant ist, mit allen den nu^etzen vnd rechten, alz wir ez in aygens gewer her pracht haben, hern Vlreichen von Pergauwe vnd seinen erben ze rechter ebenteur vnd scherm fu^er graf Nychlasen den guniamaister (sic) vnd fu^er seinen sun, den er hat mit seiner erern hausurowen vron Elzbeten, der Got genade, des Alten von Harsendo/rrf tochter, dem auch Got genade, als lang, vntz daz si dem egenanten hern Vlreichen von Pergauwe vnd seinen erben bestaetent mit ir brief vnd jnsigiln, daz si sich des haus ze Vestenbu^erch vnd alles des, daz dar zu^e geho^eret, aygen lehen in vrbar ze holtz ze velde vnd ze do^erff ez sey gestift oder vngestift versu^echt oder vnuersu^echt verlehent oder vnuerlehent, swie so daz genant ist, gaentzleich verzechent vnd fu^ertzicht tu^ent, daz si dar auf nimmer mer chain ansprach haben, vnd swenne daz geschicht, so sol vns denne vnser do^erf ze Nidern Ekchendo^erf vnd swaz dar zu^e geho^eret, von hern Vlreichen von Pergauwe vnd von seinen erben der ebenteur vnd des scherms von in ledich sein an allen chriege. Waer aber, daz si von graf Nichlasen dem guniamaister vnd von seinem sun vnd von irn erben mit recht an dem egenanten haus Vestenbu^erch vnd an alle dev, vnd dar zu^e geho^eret, als vor verschriben ist, icht ansprach gewunnen, swaz si des schaden nement, daz suln wir in allez auz richten vnd wider chern an allenn irn schaden, vnd suln auch si daz haben auf dem egenanten do^erffe vnd auf alle dev, vnd dar zu^e geho^eret, als ebenteur vnd scherms recht ist vnd des landes recht ze O^esterreich. Vnd dar vber so gib ich Alber von Pu^echhaim in disen brief zu^e einem warn v^orchunde diser sache versigilt mit meinem jnsigil vnd mit meins ritter insigil hern Dietreichs des Mairhofer, der diser sache gezeug ist mit seinem insigil. Diser brief ist geben ze Wienne nach Christes gebu^ert dreutzehen hundert iar, dar nach in dem fu^emf vnd fu^emftzgisten iar an sant Agnesen tag.

Source Fulltext: OÖUB 7 (Wien 1876), S. 398f., Nr. 387