Wir Albrecht etc. tun chunt, daz wir vnserm getrewen Helmharten dem Jo^erger gelten sullen sechs hundert pfunt wienner pfenning die er vns zu der losung des saczes ze Ror berait gelihen hat, vnd haben wir in vnd sein erben darvmb behauset daselbs gen Ror von sand Jo^ergen tag der nu nehst hin ist sechs ganze jar nach einander also, daz si sich selb in den sechs jaren von den nuczen ze Ror richten vnd weren der vorgenanten sechs hundert pfunt pfenning, daz ist auf ein iglich iar.hundert pfunt, vnd wenn die sechs iar auz sind so sullen si vns oder vnsern erben die vorgenant vest ze Ror ledichlich widerantwurten an all widerred, wir sullen si ouch daselbs ze Ror die egenanten zeit nicht enthausen noch vercheren in dhainein weg. Ez ist ouch geredt daz si die egenant vest vnd levt vnd gut daselbs die vrist vnuertorbenlich innhaben vnd daz si vns vnsern liben sunen Rudolf Friderich Albrecht vnd Levpolt hertzogen vnd vnsern erben damit wartend vnd gehorsam sein, vns vnd die vnsern darin vnd darauz ze lazzen an iren schaden wenn des in der obgenanten zeit not beschiecht. Des geben wir etc. Datum in Lintz feria quarta ante Johannis Baptiste anno. lviij°.

Source Fulltext: OÖUB 7 (Wien 1876), S. 579f., Nr. 569