Ich Pylgreim der Schallenberger vnd vrau Wendelmu^et mein hausvrau vnd ich Seyfrid der Schallenberger vnd vrau Agnes mein hausvraw vnd all vnser erben veriehen offenbar, daz wir verchauft haben vnd ze chauffen haben geben Petrein dem Harracher vnd allen seinen erben den hof cze Weigleinsdo^erf, der gelegen ist in Czeller pfarr vnd der da lehen ist von dem goczhaus cze Pazzau, vmb (ein) gelt dez wier gancz vnd gar gericht vnd gewert sein, vnd haben in den selben hof geben mit allen ern vnd nuczen vnd rechten die darczu^e geho^erent. Wer aber, daz iemant her fu^er cho^em der bezzer erb wolt sein denn der vorgenant Petrein der Harracher vnd sein erben zu^e dem vorgenanten hof, der hat vollen gewalt cze losen vmb czway hundert phunt phenning vierczehen tag vor der liechtmezz vnd vierczehen tag hin nach, daz in deu red stet vnd vnuerchert beleyb, darvber geben wir in den brief ich vorgenanter Pylgreim der Schallenberger vnd ich Seyfrid der Schallenberger mit vnser bayder anhangenden jnsigel, vnd czu^e einer bessern sicherhait mit der erberigen herren vnd ritter ynsygel herren Pylgreims des Walchs vnd herren Chunrads von dem Stain, deu diser sach geczeug sint in an schaden, der brief ist geben nach Cristes gebu^erd dreuczehen hundert iar vnd in dem neun vnd funczgostem iar an dem nechsten eritag nach vnser vrawen tag cze der dienst czeyt.

Source Fulltext: OÖUB 7 (Wien 1876), S. 659, Nr. 649